Паспортыбыҙҙа 5-се графаны, йәғни милләтебеҙҙе күрһәтеүҙән мәхрүм иткән академик Валерий Тишков “Башинформ” агентлығына интервью бирҙе һәм халыҡ иҫәбен алыуға әҙерлек хаҡында һөйләне.

“Бер ниндәй үҙгәртеүһеҙ һөҙөмтәләр алыу өсөн, үткән йылдарҙан айырмалы, кешеләргә баҫым яһауҙан, уларҙы агитациялауҙан, “башҡорт булып яҙыл”, “татар булып яҙыл” тип өгөтләүҙән туҡтарға кәрәк, – ти Валерий Тишков. – Кешеләргә үҙен кем итеп тоя, шулай итеп яҙылыу мөмкинлеге биреү мөһим. Әгәр кеше ҡатмарлы үҙаңға эйә, үҙен тегеләй, йә былай тоя икән, өтөр аша ике, йәки хатта өс милләтте күрһәтеү мөмкин. Күптәр “беҙҙә бөтәһе лә ҡушылды”, ти, шуға күрә милләтте билдәләү үҙаңы ҡатмарлы булыуы ихтимал. Кеше тыуғанда уҡ йә татар, йә башҡорт, йә урыҫ булып тыумай, ул тәрбиәнән, йәшәү урынынан, ғаиләһенән һәм башҡа тәьҫирҙәрҙән үҙ милләтен билдәләй”.