БАШҠОРТОСТАН РЕСПУБЛИКАҺЫНЫҢ МАТБУҒАТ ҺӘМ МӘҒЛҮМӘТ ХЕҘМӘТКӘРҘӘРЕ КӨНӨ МЕНӘН!

Был байрам, киләһе дүшәмбе ял көнөнә тура килеү сәбәпле, бөгөн Матбуғат йорто алдындағы майҙанда үткәрелә. Унда республика гәзит һәм журналдары үҙҙәренең уҡыусылары менән осраша, матбуғатҡа яҙылыу ойошторола, байрам концерты күрһәтелә. Интернет беҙҙең көндәлек тормошобоҙға ни тиклем әүҙем үтеп инмәһен, “матбаға” сараларының йәмғиәттә үҙ урыны бар. Сөнки гәзит һәм журналдар ташҡа баҫыла икән, уларҙы уҡыусылар ҙа аҙ түгел. Айырыуса, өлкән йәштәгеләр интернет һымаҡ коммуникация сараларын хәҙер инде үҙләштерә алмаясаҡ. Әлегә ҡағыҙҙа нәшер ителгән баҫмаларҙы ла күпселек өлкән быуын уҡый. Ә уларҙы мәғлүмәт сараларынан мәхрүм итеү һис тә яраған эш түгел. Ә бына баҫма мәғлүмәт сараларына яҙылыусылар бармы һуң? Дәүләт һәм йәмәғәт эшмәкәре Тәлғәт Сәғитов: – Былтыр булдымы икән, фекерҙәштәр йыйылған ҡорҙа элекке бер коллегам, хәҙер ул гәзит-журналдарҙы кем уҡый, кемгә кәрәк, уларҙы кемдәр алдыра, тигән һүҙҙәр әйтеп ташланы.