+12 °С
Ямғыр
Бөтә яңылыҡтар
Дөйөм мәҡәләләр
11 Ноябрь 2023, 13:30
“Әле һаман уны яратам!..”
Арабыҙҙа бар шундай гүзәл зат вәкилдәре: кем әйтмешләй, кәрәк икән - утҡа инә, кәрәк икән - сабып барған атты тотоп туҡтатыр. Минең дә бына ошондай таныш ҡатын бар. Ҡасандыр беҙ уның менән бергә юғары уҡыу йортонда белем алғайныҡ. Ул башҡа студент ҡыҙҙарҙан үҙенең саялығы, ир-егеттәр кеүек ҡыйыулығы, ойоштора белеү һәләте, ҡурҡыу белмәүе, вәғәҙәһендә тороуы, аныҡ һәм һәр йәһәттән теүәл булыуы менән айырылып торҙо.
“Әле һаман уны яратам!..”
Ундайҙар хаҡында бәғзеләр “уның янында таш стена артында кеүекһең” тип әйтеүсән. Хәйер, хоҡуҡ һаҡлау органдарында ошондай ҡыйыу йөрәклеләр хеҙмәт итергә тейештер ҙә бит?! Ярай, бөгөн һүҙебеҙ был хаҡта түгел, ә күптән түгел булған хәл тураһында.
...Яңы йыл байрамынан һуң тормош мәшәҡәттәре буйынса баш ҡалала йөрөгәндә Эльвираны осраттым. Тамсы ла үҙгәрмәгән: әйтерһәң дә, йылдар уны урап үтә. Тик бына кәйефе ниңәлер төшөнкө ине. Беребеҙ ҙә уны ошондай килеш осратырға күнекмәгәнбеҙ. Ул – беҙҙең өсөн тормошто яратыусанлыҡтың, оптимизмдың һәм йәшәү дәртенең бер аныҡ миҫалы.
Күрәһең, Яңы йыл байрамы был хәлгә сәбәпселер һәм эҙен ҡалдырғандыр. Һәр кем, нигеҙҙә, тап ошо мәлдә тормош юлдарын барлаусан. Бына Эльвира ла үҙенең ғүмер сылбырын ипкә килтергәндер.
“Һин беләһең дә инде беҙҙең осорҙа уҡыған Байрасты? Беҙ уның менән дуҫ инек” – тине ул. “Эйе, хәтерләйем”, – тип яуапланым. “Мин бит әле һаман уны яратам. Үҙемдең ғорурлығым, үҙаллылығым, тиҫкәрелегем менән ғүмерлеккә юғалттым үҙен. Ул да бик ғорур ине. Байрас менән бергә ул йәшәгән районға китһәм була ине бит. Хәҙер терһәкте тешләп булмай”, – тине Эльвира.
Ә күҙҙәрендә – йәш бөрсөктәре. Бер ҡасан да был ҡатынды ошондай яҡлауһыҙ, нескә күңелле итеп күргәнем юҡ. Ошо мәлдә “Иң яҡшы әңгәмәләшсе – ул башҡаларҙы тыңлай белгән кеше” тигән һүҙҙәр иҫкә төштө. Өҫтәүенә был осраҡта нимә тип әйтергә лә нисек йыуатырға һуң? Яҙмыш ептәрен беҙ, ҡыҙғанысҡа ҡаршы, үҙебеҙ теләгәнсә урай алмайбыҙ шул. Шуға шым ғына тыңланым.
“Аҙаҡ бер ир менән таныштым-танышыуын, бергә йәшәп тә ҡараным. Әммә тормошом барыбер барып сыҡманы. Яратмайым уны. Ә мин, үҙең беләһең, һис ялағайлана, тормошҡа яраҡлаша белмәйем. Ярай, хеҙмәт урынында барыһы ла яҡшы, тик ғүмер буйы эш тип кенә йәшәп булмай шул, икенсе яртың менән бергә ғүмер итке килә. Ә Байрасты һис онота алмайым. Әле һаман яратам. Ул иһә ғаилә ҡорған, улы менән ҡыҙы бар. Мин иһә япа-яңғыҙ...”
Ошо осрашыуҙан һуң күңелгә бер уй килде. Юҡҡа ғына "ҡатын-ҡыҙ – ғаилә усағын, өй ҡотон һаҡлаусы, ғүмер бүләк итеүсе" тип әйтмәйҙәр бит. Үткәндәр менән йәшәргә яраймы икән? Тап әлеге мәлдә бар йәшәйешебеҙгә риза, ҡәнәғәт булып ғүмер итеүгә бер ни етмәй түгелме?..
Фото: millionstatusov.ru.
Сығанаҡ: https://bashgazet.ru/articles/m-kh-bb-t-ba-sa-y/2020-05-12/le-aman-uny-yaratam-666714
Читайте нас:
© 1925-2024 «Һәнәк» Республика сатира һәм юмор журналының сайты. Сайт Республиканского журнала сатиры и юмора «Хэнэк» («Вилы»). Ойоштороусылары: Башҡортостан Республикаһының Матбуғат һәм киң мәғлүмәт саралары буйынса агентлығы; Башҡортостан Республикаһының "Республика Башкортостан" нәшриәт йорто дәүләт унитар предприятиеһы. Учредители: Агентство по печати и средствам массовой информации Республики Башкортостан; Государственное унитарное предприятие Республики Башкортостан Издательский дом "Республика Башкортостан".
Зарегистрирован Федеральной службой по надзору в сфере связи, информационных технологий и массовых коммуникаций по Республике Башкортостан 20 февраля 2017 года. Свидетельство о регистрации ПИ № ТУ02-01584
Баш мөхәррир: Илгиз Вәкил улы ИШБУЛАТОВ
Телефон
(347)292-77-60
Электрон почта
Адресы
450079, Башҡортостан Республикаһы, Өфө ҡалаһы, Октябрҙең 50 йыллығы урамы, 13. Республика Башкортостан, г. Уфа, ул. 50-летия Октября, 13.
Редакция
(347)292-77-60
Ҡабул итеү бүлмәһе
(347)292-77-60