+28 °С
Облачно
Дөйөм мәҡәләләр
8 Октября 2025, 10:00
СЫБЫРТҠЫ
Буш өйҙөң һарайындағы өрлөк сөйөндә сыбыртҡы эленеп тора. Камил ағайҙыҡы ул. Хәҙер үҙе лә, әбейе лә мәрхүмдәр инде.Камил ағай ғүмере буйы ауыл көтөүен көттө. Уның ҡыҫҡа һаплы оҙон көтөүсе сыбыртҡыһын белмәгән кеше юҡ ине. Баш бирмәгән һыйыр, кәзә-һарыҡтар ҙа уны татып ҡарағаны булды.
СЫБЫРТҠЫ
Иртүк сыбыртҡыһын бер шартлатҡансы һелтәп ебәреүе менән, ауылдаштары малын көтөүгә ҡыуа башлай торғайны. Һыйырҙар мөңрәп, кәзә-һарыҡтар баҡырып йәшел һутлы үлән ашарға яланға ашыға. Кисен саң туҙҙырып, тамаҡтары туйып, һыйырҙарҙың елендәре тулып йорттарына ҡайталар. Бына шулай Камил ағайҙың сыбыртҡыһы ҡулынан төшмәне.
Бер нәмә лә мәңгелек түгел: йәштәр, ауылда ҡалмайынса, ситкә китеп, ололар үлеп бөткәс, мал-тыуар ҙа ныҡ кәмене. Инде хәҙер урам тулып көтөүгә сығыусы, көтөүҙән ҡайтыусы һыйыр, кәзә-һарыҡтар ҙа юҡ. Уларҙы көтөрлөк Камил ағай һымаҡ көтөүсене лә табырмын тимә. Бер кем риза түгел. Әмәленә күрә ғәмәле тигәндәй, хәҙер электр көтөүсеһе бар. Ә уға сыбыртҡы кәрәкмәй.
Тәлғәт ШАҺМАНОВ.
