+28 °С
Болотло
Дөйөм мәҡәләләр
3 Ноябрь 2025, 05:45
* * *
104 йыл элек Октябрь революцияһы булып, 70 йылдан ашыу йыл илдә социализм ҡоролошо хакимлыҡ итте. Оло быуындар ул ҡоролошта йәшәп тә өлгөрҙө.7 ноябрҙә халыҡ демонстрацияға сыға торғайны. Беҙҙе, БДУ студенттарын да, сығаралар ине. Һәр төркөмдән алыҫ райондарҙан булған 5-6 студентҡа ғына ауылына ҡайтырға рөхсәт ителә ине. Ҡалғандар бөтәһе лә демонстрацияла ҡатнашырға тейеш.Колонна-колонна булып теҙелеп торабыҙ, тәүҙә – ул саҡтағы Фрунзе (хәҙерге Зәки Вәлиди) урамында. Һәр беребеҙҙең тиерлек ҡулда байраҡ, флаг, портрет, плакат-фәлән. Уларҙы берәй ергә йыйып һөйәп торабыҙ. Бейешәбеҙ, йырлашабыҙ, йәш саҡ, күңелле саҡ. Гармун йә баянлы кешеләр ҙә бар.
* * *
Шунан Октябрь проспектына тиклем атлайбыҙ, нисектер әллә ни арытмай ҙа ине. Ҡала Советы туҡталышын үткәндә трибуналағы юлбашсыларҙың орандарын хуплап ура ҡысҡырабыҙ. Уныһы ла күңелле осорҙоң бер күңелле мәле булып иҫтә ҡалған: бөтә тауышҡа ҡысҡыраһың, бик мәрәкә.
Ҡаҡшамаҫ, бер ҡасан да юғалмаҫ булып тойолған бөйөк держава күҙ асып йомған арала юҡҡа сыҡты. 7 ноябрь хәҙер календарҙарҙа Октябрь революцияһы көнө тип билдәләнә. Әммә ул байрам халыҡтың хәтерендә матур йәшлек йә күңелле баласаҡ булып һаман һаҡлана.
Ә. НУХОВА.
Фотолар: Валерий ШАХОВ, 1981 йыл.
* * *
