Әлегә бәпес тип ҡабаланмағыҙ...

Ана, сибәрлеге менән генә түгел, ихлас йылмайыуы менән  барса халыҡты  үҙенә йәлеп иткән  шөһрәтле актриса Мәйсәрә Әхмәтовна тора.  Әхирәте уныһын һораша, быныһын.

- Балалар нисек, ҡайҙа?

- Былай һәйбәттәр.

- Улың ҡайтып-китеп йөрөйҙөр?

- Бергә йәшәйбеҙ бит.

- Нисек инде бергә?  Ырымбурҙа ине түгелме ни?

- Килен менән айырылыштылар бит.

- Бәй, нимә булды, бик матур йәшәп ятҡандары һымаҡ ине лә.

- Ҡуй инде, килендән уңманыҡ, Эй. Шул килен эшләмәй тип барҙы инде. Хәҙер күп ирҙәр эшләмәй инде ул, бер ул ғына эшләмәйҙер шул. Хәҙер эшләргә йүнле эше бармы ни

- Хәҙер ейәнең дә үҫкәндер  инде…

- Үҫте генә тиһеңме, өйләнде, кисә генә никах уҡыттыҡ.

- Ҡалай шәп булған! Егеттәрҙең үҙ ваҡытында башлы-күҙле булғаны арыу, –әхирәте ҡыуанысын белдерергә ашыҡты.     

- Ә улар  ҡайҙа йәшәй?

– Миндә…   - Мәйсәрә Әхтәмовна күңелһеҙ генә яуапланы ла ҡулын һелтәне.

- Ҡуй инде, ҡуй, әхирәт. Уларын да килен һыйҙырманы, ғазраил. - Бая ғына йөҙө айҙай балҡып торған  ханымдың хатта күҙ йәштәре килеп сыҡты. Унан ике-өс урында түңәрәктәр алып барыуы, үҙе аш бүлмәһендә йоҡлап йөрөүе хаҡында һөйләне ул.

- Шуға ла йәнем көйөп, әлегә бәпес тип ҡабаланмағыҙ, тәүҙә эш табығыҙ, – тинем әле. 

Октябрь башы. Тәбиғәттең алтын кеүек мәле.  Халыҡ театрҙы асыу миҙгеленә йыйылған.  Тамашаны алып   барыусы ҡыҙ йәйге осорҙағы яңылыҡтар менән таныштырҙы: кем ниндәй исем алған, кем ишен тапҡан. Унан залдағыларға ҡарап:

- Ҡәҙерле дуҫтар, бөгөн беҙҙең арала сәнғәт алиһәһе Мәйсәрә Әхтәмовнан да бәхетле кеше юҡтыр, - тине. – Ул күптән түгел генә ҡарт өләсәй булды. Ҡотлайбыҙ һеҙҙе, Мәйсәрә Әхтәмовна! -Шөһрәтле актрисаға баҙрап торған гөлләмә  килтереп тотторҙолар.

 Шуны ғына көткән ихлас тамашасылар гөрләтеп ҡул сапты.  Иң алғы рәттә ултырған актриса урынынан ҡалҡынды ла,  балҡып-йылмайып, ынйы кеүек тештәрен күрһәтеп, залдағыларға баш эйҙе. Был мәлдә уның  күңелендә  ниндәй уй-тойғолар  сыуалғанын бер кем дә белмәй ине. Актриса ҡулындағы сәскәләрҙең иҙәнгә төшөп киткәнен дә һиҙмәне.

Фото: topflo.ru

https://shonkar.com/articles/culture/2024-05-10/leg-b-pes-tip-abalanma-y-3761146