Бер литр балын йәлләне

Үҙенән олораҡ Мәүсилә менән Сәлимә апайҙары бар. Улар ут кеүек үткер, һыуыҡҡа ла бирешмәй, сирләмәй ҙә.

– “Сихут” бит һин. Ел иҫкәнгә лә ауырып бараһың. Беҙҙең менән йөрөмә, ҡунаҡта сәй ҙә эсеп булмай. Бер туҡтауһыҙ йүткереп, кеше ерәндереп ултыраһың, – тиеп  үҫә килә апайҙары Мәҙинәне үҙҙәре менән алмай башланы. Шуға ла ҡыҙ баҙнатһыҙ, үҙенә ышанысһыҙ ғына булып үҫте. Күмәк кеше араһында йөрөргә яратманы. Үҙ донъяһында тыныслыҡта  күңеленә рәхәтерәк ине.

Тормошта үҙ юлынан бара бирҙе. Йыш ауырығанға медицина юлынан китте. Үҙенең һаулығын да, башҡаларҙыҡын да ҡайғыртты. Ваҡыты еткәс, апайҙары һымаҡ уҡ тормошҡа сыҡты, балалар тапты.

Ғүмер буйы  физик яҡтан шәплеге булманы. Ныҡ итеп көсәнеп эшләй башлаһа, тыны ҡыҫылды, хәле бөттө. Ярай әле ире, балалары һәр яҡлап ярҙам итергә тырышты. Яҙлы-көҙлө дауаханаға барып уколдар алдырып, төрлө дарыу үләндәре төнәтмәләре, бал кеүек шифалы ризыҡтар менән нисек тә һаулығын нығытырға тырышты.

Апайҙарыныҡы һымаҡ уҡ донъяһы ныҡ шәп булмаһа ла, булғанына шөкөр итте.

Ғүмер буйы һоҡланып йәшәгән апайҙары ғына ҡайнап йәшәнеләр ҙә ҡапыл ғына бер-бер артлы  был донъянан китеп барҙы. Өлкән Мәүсилә апаһы мунсала ныҡ итеп сабынып, йөрәге күтәрә алманы, Сәлимә апаһы бәрәңге утағанда эҫелә көсәнеп эшләп, ҡан баҫымы күтәрелеп, яҡты донъянан китеп барҙы.

Әле уларҙың рухына тип Ҡөрьән ашы уҙғарырға йөрөй Мәҙинә, балалары ла ярҙамлашырға ҡайтты. Ваҡ-төйәкте ҡараштырып ҡуяйым тип, шкафты асыуға күҙенә бер литрлы банкалағы бал салынды. Сәлимә апаһы күстәнәс итеп биреп ҡайтарғайны бит уны. Ул ваҡиға ҡабат күҙ алдына килде.

...Ике йыл элек Мәүсилә апайҙарына ҡунаҡҡа йыйылдылар. Бик матур үтте юбилей. Ҡайтыр саҡта Мәүсилә апаһы феләктән бер литрлыҡ банкаға бал һалып, Сәлимә һеңлеһенә  бирҙе.

– Өйөмдө йыуғанда ныҡ ярҙам иттең. Һиңә бал вәғәҙә иткәйнем, быйыл умарталар балды бигерәк шәп бирҙе, – тине.

Мәҙинәгә күстәнәскә шоколад-кәнфит тотторҙо. Яңы ғына айыртылған балға ымһынып ҡарап ҡуйғанын да тойманы шул саҡ апаһы. Сығып машиналарына ултырғанда Сәлимә апаһы янына килеп шым ғына:

– Мәҙинә туғаным, һин ауырып ҡына тораһың. Бал һиңә нығыраҡ кәрәгерәк булыр. Минең үҙемдә тағы ла  бар ул, – тип төрөлгән банканы уның сумкаһына һалды.

Эй, шул балға күңеле булып ҡайтып киткәйне Мәҙинә. Апайҙарының рухына арналған Ҡөрьән ашына килеүселәрҙең ризығына яҙған икән был ризыҡ...

Автор фотоһы.  

Резеда Шәнгәрәева.

https://bashgazet.ru/articles/y-m-i-t/2026-02-01/fel-kt-re-tulyp-bal-ultyr-a-la-ber-litr-balyn-sirle-e-le-en-n-y-ll-ne-4559649