Йылмайып алайыҡ әле!

Киске яҡта иҫереп ҡайтҡан ир йоҡоға тала. Ҡатыны, ул йоҡлаған арала бүлмәләге тәҙрә пәрҙәләрен алыштырып, икенселәрен ҡора. Иртән, йоҡоһо туйып уянған ир тиҙ генә һикереп тора ла, ашыҡ-бошоҡ кейенә башлай. Йоҡо аралаш хәләл ефете: “Ҡайҙа бараһың инде таң тишегенән?” – тип һорауына теге уҫал сырай менән: “Тик кенә ят, минең бында йоҡлағанды ҡатын белһә. Һин дә бөттөң, мин дә бөттөм”, - тип яуап ҡайтара.

***

Циркта иҫ киткес номер: крокодил пианинола уйнай, ә бегемот романс йырлай. Зал шығырым тулы, баш әйләнерлек уңыш. Директор түҙмәй, был номерҙың авторына мөрәжәғәт итә:
– Дөрөҫөн әйтегеҙсе, бының бит булыуы мөмкин түгел: нисек инде крокодил пианинола уйнай, ә бегемот йырлай? – ти.
– Эйе, һеҙ дөрөҫ әйтәһегеҙ, – тигән номер авторы. – Әлбиттә, бының булыуы мөмкин түгел. Ысынында иһә бегемот ауыҙын ғына аса, ә крокодил уйнай ҙа, йырлай ҙа.

***                                      

Ике буйҙаҡ һөйләшә:
– Яңыраҡ ҡына, Мәрйәмгә өйләнәм, тип хәбәр һөйләп йөрөй инең, әле кире уйлағанһың. Берәй әтнәкәһе бармы әллә?
– Әйтһәм әйтәйем инде, ул бик йәмһеҙ итеп көлә икән.
– Әлләсе, мин бер ҙә һиҙмәнем...
– Уға элекке көн күпме эш хаҡы алғанымды әйткәйнем, көлөп, быуылып үлә яҙҙы.

А. ВАСИЛОВ һүрәте.