Бик хәйерсе фатирҙа, аяҡтарын көскә һөйрәп, бер тараҡан ризыҡ эҙләп йөрөй. Кухняла бер нәмә лә тапмағас, карауатында ятҡан ҡарсыҡ эргәһенә килә:
– Нимә, әбей, был айҙа ла пенсиябыҙҙы тотҡарлайҙармы ни?
***
Бер ҡарт пенсия алған да, күптән ит ашағыһы килгәнлектән, баҙарға барған.
– Улым, әйтмәҫһеңме, бынау бер түтәрәм итте алһам, хаҡы күпмегә төшөр икән?
– Әйтермен, тик валидолың үҙең менәнме, бабай?
***
Ике ханым һөйләшә:
– Йә, Хәҙисә, курортта нисек ял иттең?
– Әҙерләгән ризыҡтары ашарлыҡ түгел ине – шулай ҙа мин бик ҡәнәғәтмен. Бер айҙа егерме килоға ябығып ҡайттым.
***
– Олатай, үҙеңә берәйһе насарлыҡ эшләһә, яҡшылыҡ менән яуап ҡайтарырға кәрәк тигән һүҙ дөрөҫмө?
– Эйе, улым.
– Улайһа, туңдырма алырға аҡса бир әле – мин һинең күҙлегеңде ваттым...
***
– Әкрәм, һинең бик сәйер ғәҙәтең бар – тиктомалға башыңды һелкеп ҡуяһың.
– Сәсемде артҡа һелтәйем.
– Бәй, һин пеләшһең бит!..
– Сәс ҡойолоп бөттө, ә ҡәһәр төшкән ғәҙәт ҡалды.
***
Бер ир спорт тауарҙары магазинында:
– Һеҙҙә 52-се размерлы саңғы ботинкалары бармы?
– Нисәнсе?!.
– 52-се.
– Шундай аяҡлы кешегә ишшү саңғы нимәгә кәрәк һуң?
**
Кавказдағы бер ауылда 150 йәшлек ҡортҡа 130 йәшлек ҡартты битәрләй:
– Бөтәһенең дә балалары балалар һымаҡ – әйткәнде тыңлай, минеке генә ҡолағына ла элмәй. Һиңә йөҙ йыл тылҡыйым бит инде, йыумайынса еләк-емеште ашарға ярамай, тип!..
***
Кадрҙар бүлегендә бер ирҙән:
– Һуңғы урында оҙаҡ эшләнегеҙме? – тип һорайҙар.
– Алты йыл.
– Ә ниңә унан киттегеҙ?
– Амнистия иғлан иттеләр.
***
Уҡытыусы студенттарға һөйләй:
– Йыл буйы дәрескә йүнләп йөрөмәгәнлектән, һеҙ математиканы бик хөрт беләһегеҙ. Минең уйлауымса, һеҙҙең 70 процентығыҙ зачетты тапшыра алмаясаҡ.
Арттағы рәттән тауыш:
– Беҙҙең ул тиклемебеҙ бөгөн дәрестә лә юҡ әле.
***
Ике әхирәт серләшә:
– Ниңә һин Фәритеңә исеме менән түгел, ә “ҡәҙерлем” тип кенә өндәшәһең?
– Бутап, “Фәнил” тип әйтеп ҡуйырмын тип, ҡурҡам.
***
– Минең бисә йыл һайын үҙенең тыуған көнөнә шәшке тун алып биреүемде талап итә.
– Шул тиклем тун нимәгә икән уға?
– Белмәйем, алып биргәнем юҡ әлегә.