РЕЖИССЁР

– Бындай толом йөрөткән режиссёр булмай инде. Бигерәк төҫөң иҫкесә,  –  тинеләр.

Ә Зарема – тиҙ генә төшөнөп бара торғандарҙан. Парикмерхскийға барып, сәсен төбөнән киҫтереп кенә түгел, башының ярты өлөшөн хатта ҡырҙырып сыҡты. Шундай заманса текә прическа эшләтте.

Белгән кешеләр һаман тәрбиәләне:

 – Тәмәке тартмаған режиссёр булмай,  –  тинеләр,  –  бөтөн билдәле режиссёрҙарҙың бармағында сигарет баҙлай.

Бер-ике ай сәсәп алырға тура килде, әммә шундай оҫта итеп тартырға өйрәнде, Мэрлин Монро үҙе көнләшер. Ҡыҙыл тырнаҡлы бармаҡтарының араһындағы нәҙек тәмәке үҙе бер сәнғәт өлгөһө һымаҡ ине.

Әммә белемселәр тағы кәмселек тапты:

 – Арҙаҡлы режиссёрҙар менән шарап эсеп, бөйөк идеялар хаҡында серләшеп төндәр үткәрмәй тороп, был сергә төшөнөп булмай.

Булды. Улары ла булды. Унан ҡала, тағы әллә күпме һынауҙар үтелде. Һығымтала, бөгөн Зарема шундай тәжрибәле, донъя күргән һәм заманса тормош алып бара, әммә әлегәсә сәхнәгә бер нәмә лә сығарғаны юҡ. Ярай, булыр әле. Эргәһендә аҡыллы кешеләр етәрлек – өйрәтерҙәр.