+21 °С
Дождь
Мәҙәктәр
13 Октября 2021, 04:56
ИР МЕНӘН ҠАТЫН
Зөбәйҙә менән Абдрахмандың өйөндә әпәт бола ҡупты. Нимәнән башланғанын ҡапыл ғына әйтеп булмаҫ, әммә ғауға ҡысҡырышып талашыу менән генә бөтмәйсә, тәҙрәләр онталыуға, урамда баҫтырышыуға һәм күрше-тирә йүгерешеп килешеүгә барып етте. Күршеләрҙең бер яҡтағылары килә һалып ярһыған ирҙең ҡулынан шаҡарып ниндәйҙер ҡоралды алды, икенсе яҡтағылары айырылып китергә йыйынған ҡатынды туҡтатты.
ИР МЕНӘН ҠАТЫН
– Абдрахман ағай, ҡалай насар кешеһең, ҡатын менән һуғышаһың! – тип оялтты ирҙе бер яҡ.
Икенсе яҡ ҡатынды шелтәләне:
– Зөбәйҙә, һуң һин ни эшләп улай иргә ҡаршы тораһың?
– Абдрахман менән йәшәп ҡарағыҙ үҙегеҙ, туҡмалып ултырғығыҙ килер ине микән? – тип, һүҙен бирмәй теге күрше.
– Зөбәйҙә үҙе лә тик тормай ул, уның телен мин ишетеп йөрөйөм, – был яҡ күрше лә бирешмәй.
– Абдрахмандың эт ялҡауы икәнен беҙ ҙә күреп торабыҙ был яҡтан, һәр саҡ Зөбәйҙә йөрөй мал араһында ла, баҡсала ла.
– Абдрахман зату аҡса эшләй! Ул тапҡан малды һин тапһаң, хан һымаҡ ятыр инең әле!
– Зөбәйҙәнең....
– Абдрахманды...
– Зө..
Янъял баҫырға килгән ике яҡ күршеләр тасма-тас иреште лә китте, хатта хужаларға уларҙың үҙҙәрен тоторға, ике яҡҡа этәреп тигәндәй таратып сығырға тура килде. Кискә Зөбәйҙә менән Абдрахман ярашып, ҡосаҡлашып йоҡларға ятты, ә ике яҡ күршеләре инде айҙан ашыу дошманлашып йөрөй.
