Вәғәҙә

— Өләсәйемә барам. Ә һин таң менән нимә эшләп йөрөйһөң?

— Һайлаусыларым менән осрашыуға барҙым. Әйҙә, минең ышаныслым бул әле. Өләсәйең янына һуңыраҡ бергә барырбыҙ.

— Минең тел байлығым юҡ шул, Бүре.

— Уныһы минең үҙемдә етерлек. Һинең бурыс йәнлектәрҙе йәлеп итеү.

Һуңынан Бүре ағас башында ултырған Һайыҫҡанға өндәшә:

 — Ә һин, асыҡ ауыҙ, был хәбәрҙе тиҙ генә тарат әле. “Депутатлыҡҡа кандидат менән осрашыу була. Һуңынан Ҡыҙыл Башлыҡ стриптиз күрһәтәсәк!" – тип әйт.

 — Туҡта әле, Бүре. Һин ни эшләп намыҫлы ҡыҙҙы мыҫҡыл итәһең. Мин һиңә әле ризалығымды  ла бирмәнем бит, – тип бүлдерҙе уны Ҡыҙыл Башлыҡ.

 — Эһем, ризалығың күпме тора инде?

 — Өләсәйемә – яңы йорт, ә миңә – машина.

 — Булыр, шәшке тун да өҫтәрмен.

Осрашыу иҫ киткес һәйбәт уҙҙы. Бүре һайлауҙа йөҙ процент тауыш йыйҙы. Ә Ҡыҙыл Башлыҡ менән әбейҙең яҙмышы былай хәл ителде: һайлау технологияһының  серен сисмәһен өсөн, Бүре Ҡыҙыл Башлыҡты тотоп ашаны. Әбейҙе йорт һалымын түләмәгәнгә аласыҡҡа күсерҙеләр.

Фото: www.behance.net