+17 °С
Облачно
Мәҙәктәр
7 Августа 2022, 05:00
Шәрә ҡаҙҙар
Ауылда йәшәүселәрҙең күбеһе һымаҡ, улар ҙа ҡаҙ аҫраған. Ләкин күршеләре быны оҡшатмаған, сөнки ҡоштар баҡсаларынан сыға белмәгән, барыһын да һыпырып ашаған.
Шәрә ҡаҙҙар
Берҙән-бер көндө ир менән ҡатын урмандан ҡурай еләге йыйып алып ҡайтҡан. Алып ҡайтҡандар ҙа онотҡандар. Иҫтәренә төшөргәндә ул әсеп, ажғырып ултырған. Ни эшләтергә? Түккәндәр. Ә ҡаҙҙар тотҡан да ашаған.
Ир менән ҡатын өйҙәренән сыҡһа, уларҙың барыһы ла аяҡ һуҙған, ти. Күршеләрҙең генә эше, ағыулағандар, тигән уйға килгәндәр. Боҙоҡ итте ашарға ярамай. Һис юғы мамығын әрәм итмәйек, тип тегеләрҙе йолҡҡандар. Шунан урманға алып барып, соҡорға ташлағандар.
Ә иртән тотош ауыл урмандан теҙелешеп ҡайтҡан шәп-шәрә ҡаҙҙарҙы тамаша ҡылған.
Аҡтар һәм ҡыҙылдар
Мотаһар күршеләрҙеке менән буталмаһын өсөн ҡаҙҙарын буярға булған. Магазиндан ҡыҙыл буяу алып ҡайтҡан да тегеләрҙең арҡаһына тәре һәм ярым ай төшөрөп сыҡҡан. Ысын күңелдән эшләгән, буяу йәл түгел, юғалмаһындар ғына.
Ҡаҙҙар йылғаға киткән. Кис көнө ауыл геү килгән, бар халыҡ урамға ябырылған: юлдан ҡып-ҡыҙыл ҡаҙҙар отряды атлаған.
– Граждандар һуғышындағы һымаҡ, иртән аҡтар китте, кискә ҡыҙылдар килде, – тигән Шәмсетдин бабай.
Р. ИҪӘНҒОЛОВ.
Фото: zoovet48.ru
Новости партнеров
