– Мин, Рәхим Хамматович, һыйырҙарҙан ҡайһы ерең ауырта тип һорамайым, ҡарайым да беләм, – ти икән ауырыу ветеринар. – Ҡарағыҙ ҙа диагноз ҡуйығыҙ.
Табип, бер аҙ уйланып ултырған да, быға сисенергә ҡушҡан. Арҡаларын, түштәрен арлы-бирле баҫҡылап ҡарағандан һуң шәфҡәт туташын саҡырып:
– Быға тоҙ һалып, бер биҙрә ашлы һыу бирегеҙ. Бер-ике көн тотҡас, мандымаһа, һуйырбыҙ, – тигән ти.
Ике майор, 15 башҡорт
Бер бабай менән әбей йоҡларға ятҡас, уларҙың өй тәҙрәһен сиртеп:
– Ун биш баш ҡорот һәм ике йомғаҡ май Себергә китте, – тигәндәр, ти.
Әбей ята биргәс:
– Йә инде, Хоҙай, ике майоры урыҫтыр әле, уларына бер ни булмаҫ, анау ун биш башҡортто ни эшләтерҙәр инде, меҫкендәр, – тип йәлләгән икән.
Иртән тороп, аласыҡҡа сыҡһалар, 15 баш ҡорот, 2 йомғаҡ май урынында юҡ, ти.
Фәнүзә ИШБАЕВА.
Бөрйән районы.
Муйылға бәйлә
Беҙҙең ауылда бөтә ғүмерен колхоз эшенә арнаған, Бөйөк Ватан һуғышының ут-ялҡынын кискән Шаһибал ҡарт йәшәй. Әле һөйләнәсәк әкәмәт уның хаҡында. Яңыраҡ ҡына өйләнгән Шаһибал менән ҡайныһы күс ҡундырырға күтәргән умартаһын ҡарарға китәләр. Барып етһәләр, бәрәкалла, күс ҡунған, тимәк, кейәүҙең ырыҫы бар! Малайлыҡтан сығырға ла өлгөрмәгән кейәүе өйрәнә торһон, типтер инде, ҡайныһы ағас башына үҙе менеп китә. Матурлап умартаның кейәһен яба ла, арҡан менән ныҡлап бәйләп, икенсе осон йыуан ғына ботаҡ аша кейәүенә ырғыта:
– Кейәү, муйылға бәйлә!
Ағас япраҡтары шыбырлауы арҡаһында яҡшылап ишетмәгән Шаһибал:
– Аһ-аһ, ни эшләп муйынға бәйләй, ти, билгә бәйләйемсе, – тип арҡандың осон биленә бәйләй. Ҡайныһы бәйләгәнлеген һорағас, эшен башҡарғанды белгертә. Ҡайны кеше умартаны яйлап төшөрә. Инде үҙе төшәйем тиһә, кейәүе эргәһендә тора!
– Аһ-аһ, кейәү, нисек... ҡайһы арала менеп өлгөрҙөң? – тип аптырай ҡайныһы.
– Муйынға бәйләмәгәнгә рәхмәт әйт әле, ҡайным, – ти икән Шаһибал.
Баҡһаң, еңел генә кәүҙәле кейәүҙе умарта үҙ ауырлығы менән күтәреп мендергән икән.
Рифҡәт ИШЕМЙӘРОВ.
Ейәнсура районы.