+30 °С
Болотло
Мәҙәктәр
17 Март 2025, 12:00
Чапаевҡа сәләм!
Элек бит хәҙерге кеүек гаджеттар, компьютерҙар булмаһа ла, мәктәптәргә уҡыусыларға күрһәтергә тип, диафильмдар, кинофильмдар килтергәндәр. Бер ваҡыт уҡытыусы Фәнүзә түбән синыфтарға Чапаев хаҡында кинофильм күрһәтергә булған, уға өлкәнерәк синыф уҡыусыһы Илдус булышып йөрөгән. Фильм тамамланғас, уҡытыусы: “Бына балалар, күрҙегеҙ, белдегеҙ инде Чапаевтың кем икәнен!”, - тигән. Уҡыусылар, әлбиттә, “эйе”, тиешкән.
Чапаевҡа сәләм!
Ә Илдус: “Ярай, Чапаевты хәҙер таныйһығыҙ, күргәндә уның менән иҫәнләшеп йөрөгөҙ!” – тип түбән синыф уҡыусыларына аҡыл да биргән.
Әбей бала табамы?
Беренсе синыф уҡыусыларына уҡытыусы Ҡамыр батыр әкиәтен һөйләй, ти. “Борон-борон заманда әбей менән бабай йәшәгән, уларҙың балалары булмаған...” Шул урынға еткәс, алғы партала ултырған бер ҡыҙыҡай: “Ииий, апай, нисек әбей менән бабайҙың балаһы булһын инде”, - тип уҡытыусыны бүлдергән. Был һүҙҙәр тәжрибәле уҡытыусыны ла уйға һалған.
Р. Шәрәфетдинова.
Фото: tolyatti-tur.ru
