Барлыҡ яраштырыр...

Илдең ҡиблаһы үҙгәргәс, уларҙың тыныс тормоштарына әллә ни булды, бер-береһенә ауыр һүҙҙәр әйтеү, талаш-ыҙғыш ғәҙәти хәлгә әйләнде. Бөгөн дә Гөлшат ирен һөмһөрө ҡойолоп ҡаршы алды.
– Нимә, бөгөн дә аҡса алып ҡайт­ма­ныңмы?
– Юҡ, сейф буш, ти хужа. Икенсе ай­ға, бәлки, булыр, ти.
– Балаларҙың ипотекаһын нисек тү­ләйбеҙ инде, һатыр әйберҙәребеҙ ҙә ҡалманы.
– Үҙҙәре түләһен, үҙебеҙҙең бурыстар ҙа баштан ашҡан, – тине Илшат һәм ниңә өндәшкәненә үкенеп бөтә алманы.
Һуңғы йылдарҙа осон-осҡа көс-хәл менән генә ялғап йәне ҡыйылып бөткән Гөлшат ҡыҙҙы ла китте, әйтмәгән һүҙен ҡалдырманы. Илшат та төшөп ҡал­ғандарҙан түгел, ҡатынының бер зәһәр һүҙенә уны менән яуап ҡайтарҙы.
Әле ҡасан ғына мул тормошта һөйөшөп, яратышып ҡына йәшәгән ир менән ҡатындың бөгөн килеп тәҙрә быялаларын зыңлатып талашҡандарын ишеткән күршеләрe: «Шулай шул: барлыҡ яраттыра, юҡлыҡ талаштыра», – тине.

Ғәли ҒАТАУЛЛИН.