+12 °С
Болотло
Бөтә яңылыҡтар
Яңылыҡтар
12 Август 2021, 23:12

МАЙОР МӘРЙӘМ ӘБЕЙ

Телефон иртәнге унда шылтыраны. Мәрйәм әбей, бәйләмен ситкә ҡуйып, трубканы алды. – Ейәнегеҙ әле генә етди юл-транспорт ваҡиғаһы яһаны, – билдәһеҙ кеше ашығып теҙҙе. – Ҡиммәтле иномарканан йәймә генә тороп ҡалды. Ҡорбандар бар, ә был ейәнегеҙ ҡалған ғүмерен рәшәткә артында үткәрәсәк тигән һүҙ. Уны енәйәт яуаплылығынан йолоп алып ҡалғығыҙ киләме? – Килә... – тине әбей иламһырап.

МАЙОР МӘРЙӘМ ӘБЕЙ
МАЙОР МӘРЙӘМ ӘБЕЙ

– Бының өсөн аҡса кәрәк!

– Күпме?

– Ике йөҙ мең! – таныш булмаған тауыш ҡәтғи белдерҙе. – Аҡсағыҙҙы әҙерләгеҙ – хәҙер беҙҙең кеше барып етер! Был шылтыратыу тураһында бер кемгә лә әйтмәгеҙ, юҡһа ейәнегеҙҙең башы төрмәлә серер!

– Өйҙә минең был тиклем аҡса юҡ, – Мәрйәм әбей һулҡылдап иланы. – Банкыға барырға кәрәк, ә ул ҡаланың икенсе башында.

– Урамға сығығыҙ, өйөгөҙгә көмөш “Жигули” килер, ҡайҙа кәрәк, шунда алып барырҙар. Хәтерегеҙҙә тотоғоҙ: бер кемгә бер һүҙ әйтмәҫкә! Юҡһа, ейәнегеҙ...

Ярты ҡаланы үтеп, банк янында туҡтағас, водитель бармаҡтарын ирененә баҫты. Яуап итеп, Мәрйәм әбей ҙә шулайтты. Ярты сәғәттән урап килде.

– Пластик картаның пин-кодын онотҡанмын, – ул ауыр һуланы. – Дачаға барып килергә кәрәк – ул унда, дәфтәргә яҙылған...

Ҡаланан 30 саҡрым алыҫлыҡтағы дачанан Мәрйәм әбей ике сумка картуф, бер кәрзин һуған күтәреп сыҡты.

– Багажникка һал да киттек! – тине эшһеҙлектән интеккән егеткә.

– Ә банк? – теге ҡабатлап һораны.

– Өйгә! – тип ашыҡтырҙы Мәрйәм әбей. – Банкыға картуф менән бара алмайым да баһа?! Юлда супермаркет янында туҡта, икмәк менән һөт алырға кәрәк...

Шофер сырайын һытты, әммә өндәшмәне. Ҡараңғы төштө. Егет борсолдо, ә әбей үҙен тыныс тотто.

– Эшһеҙлектән интегеп ултырғансы, ҡарсыҡҡа ярҙам итер инең, – тине ул, машинанан төшкәс.

Ике ҡулына ике сумка тотҡан алдаҡсы уның артынан бишенсе ҡатҡа күтәрелде. Ә унда уны полиция формаһындағы егеттәр дүрт күҙ менән көтә ине.

– Ә ейән?! – шофер юғалып ҡалды.

– Минең ейәнем сит илдә уҡый, – әбей тыныс ҡына яуапланы. – Ҡорбанлы юл-транспорт ваҡиғаһын үҙегеҙ уйлап сығарғанһығыҙ. Беҙҙең тинләп йыйған аҡсаны ҡайырып алыр өсөн. Ниәтегеҙҙе шунда уҡ аңланым!

– Улайһа, ни өсөн банкыға барҙыҡ һуң?

– Фатирға, телефонға аҡса түләргә кәрәк тә баһа.

– Дачаға?

– Картуф менән һуғанды алып ҡайтырға ҡайҙан транспорт табырға икән тип, аптырап ултыра инем. Шылтыратыуығыҙ бик шәп булды әле. Бер эштән ҡотолдом. – Мәрйәм әбей хәбәрен һөйләп бөткәс, полицейскийҙарға бойорҙо:

– Алып китегеҙ! – Аҡсаға ымһынып көнө буйы үҙен йөрөткән егетте лә онотманы. – Мин һиңә бесәйле әбей түгел, ә отставкалағы полиция майоры!

 

Автор:Р. ҠАҺАРМАНОВ.
Читайте нас: