-11 °С
Ҡар
Бөтә яңылыҡтар
Сәлимйәүһәр Мансур улы өсөн – Еңеү парады
#Еңеү80#Победа80 Сәлимйәүһәр Мансур улы Вәлиуллин – республикабыҙҙа инде, ҡыҙғанысҡа ҡаршы, бик аҙ ғына ҡалған ветерандарҙың береһе. Өфө ҡалаһының почётлы гражданы ул. Инде йөҙгә етеп бара. 1927 йылда Дүртөйлө районы Түбәнге Маншыр ауылында донъяға килгән. 1229-сы полк составында Ҡытайҙы япондарҙан азат итеүҙә ҡатнашҡан. Ете йыл буйы әрме хеҙмәтендә йөрөгән яугир. Һуғыштан һуң хәҙерге аграр университетта белем алып, унда эшләгән. Ветеринар фәндәр кандидаты.
Сәлимйәүһәр Мансур улы өсөн – Еңеү парады
Сәлимйәүһәр Мансур улы хаҡлы ялға сыҡҡансы Илеш районында баш ветврач булған. II дәрәжә Ватан һуғышы ордены, “Японияны еңгән өсөн”, “Совет армияһы һәм флотына – 30 йыл”, “Бөйөк Еңеүгә – 20 йыл” миҙалдары һәм башҡа наградалар менән бүләкләнгән.
Кескәй Еңеү парадында ҡатнашырға төрлө мәктәптәрҙән килгәйнеләр. Уҡытыусылар, студенттар, Росгвардия хеҙмәткәрҙәре лә булды. Комсомол урамында урынлашҡан йорт алды берсә шатлыҡҡа, берсә һағышҡа күмелде. Хакимиәт вәкилдәре ҡотлауын йыр-моңло сығыштар дауам итте: бер-бер артлы урыҫса “Катюша”, “Десятый наш десантный батальон”, башҡортса “Шайморатов генерал” яңғыраны. Филармония оркестры “Еңеү көнө”н башҡарғанда күҙгә йәштәр тулды...
– Мине ололап килгәнегеҙ өсөн ҙур рәхмәт, – тине ветеран.
Байрам аҙағында 300-ҙән ашыу ҡатнашыусы теҙелеп парад булып үтте. Һәр береһе эстән генә Сәлимйәүһәр Мансур улына Еңеү өсөн рәхмәт әйткәндер...
Лилиә Фазлетдинова.
Автор фотолары.
https://yanshishma.com/articles/pobeda-80/2025-04-25/s-limy-r-mansur-uly-s-n-e-e-parady-4212971
Сәлимйәүһәр Мансур улы өсөн – Еңеү парады
Новости партнеров