ҠОЙОН. Сәсмә сериал. Өсөнсө бүлек.

Бер нисә көн үткәс, Әнүәр кабинетына килеп ултырыуға, телефон шылтыраны һәм үҙен Кәбиров, тип таныштырған берәү: “Беҙгә бөгөн осрашып алыу кәрәк ине”, – тине. – Бөгөн минең көн бик тығыҙ. Сәғәт нисәлә? – Көндөҙгө сәғәт өстә “Батыр”ҙа көтәбеҙ, – тине Кәбиров. – О, юҡ, ғәфү итегеҙ, – тине Әнүәр. Сәғәт өскә мине министр саҡырта. – Ә һеҙҙең осрашыу буламы? Ышанаһығыҙмы? – тип һораны ят кеше. – Белмәйем. Ҡабул итеү бүлмәһенән шылтыраттылар, – тине Әнүәр нимәлер һиҙемләп. – Ярай, барығыҙ, мин ҡаршы түгел, – тине Кәбиров кинәйәле генә итеп һәм, – шуны белегеҙ, осрашыуығыҙ булмаһа, мин һеҙҙе көтәм, – тип трубканы һалып та ҡуйҙы.