МӘҢГЕЛЕК СӘФӘР Хикәйәнең аҙағы.

Хаттың аҙағына: “Минең исемдән кеше килер, ул һеҙгә бөтәһен дә аңлатыр”, – тип өҫтәп яҙылғайны.Бер айҙан да, ярты йылдан да кеше килмәне, бер хәбәр ҙә тойолманы. Мөнирә ире эшләгән предприятиеға теге әхирәтенә шылтыратып белеште. Уға бер нимә лә мәғлүм түгел икән. Мөнирәнең үҙенә эш урынына барып, хәлде асыҡларға тура килде. Кадрҙар бүлегендә: “Һеҙҙең ирегеҙ өс йыллыҡ отпускыһын алды һәм үҙ теләге менән вазифаһын ҡалдырыуы хаҡында ғариза яҙҙы”, – тип әйткәстәр, шаңҡып ҡалды һәм ни әйтергә белмәй директор эргәһенә инергә тырышып ҡарағайны, секретарь үткәрмәне.– Һеҙҙең ирегеҙҙең эшенән китеүен шеф бик насар ҡабул итте, үпкәләне, хатта конкуренттарға эшкә төшөүҙә шикләнеп, асыуланып бөттө, шуға, күренмәүегеҙ яҡшыраҡ булыр, – тип Мөнирәне ҡайтарып ебәрҙе.Ҡатын, иренең ҡапыл юғалыуын аңлай алмайынса, төндәр буйы уйланып, йоҡлай алмайынса ыҙаланды. Әхирәте килеп, директорҙың Әхмәтте табырға, йәки уның һымаҡ белгес эҙләргә ҡушыуын һөйләп китте. Һис кем ҡайҙа икәнлеген, кемдә эшләгәнен белмәй, йәшәгән урыны ла мәғлүм түгел. Шулай ҙа уларҙың предприятеһынан иптәше Шишмә станцияһы эргәһендәге бер магазинда күргән. Теге, танышы өндәшеп ҡараһа ла, ишетмәмеш, күрмәмеш булып китеп барған. Аҙаҡ Өфөнөң үҙендә күреүселәр ҙә табылды һәм уның ҡапыл юғалыуы бер сергә әүерелде.Ә былай тормош дауам итте. Мөнирә малайҙарына: “Атайығыҙ оҙайлы командировкала”, – тип аңлатырға мәжбүр булды. Телефонын һәр ваҡыт эргәһендә тотто, хатта бер ике тапҡыр ят номерҙан шылтыраттылар һәм өндәшмәнеләр. Мөнирә: “Әхмәт, һинме? Беҙ һине һағынабыҙ” – тип өндәшеп ҡараны, тиҙ генә бәйләнеште өҙҙөләр. Бер көн хатта полицияға барып ғариза ла яҙып ҡарағайны, йүнле яуап бирмәнеләр. Эҙләү буйынса ҡатындың үтенесен урынһыҙ, тип таптылар. Шулай итеп, ярты йылдан ашыу ваҡыт үтеп тә китте. Улдары икеһе лә балалар баҡсаһына йөрөй, киләһе йылға өлкәненә мәктәпкә барырға кәрәк. Мөнирә эшкә сыҡты. Бик теләмәһә лә, иренең ғаиләһен ташлап китеүе хаҡында әйтергә мәжбүр булды.Бер көн телефон шылтыраны...