АУЫЛСА ҺАНТЫЙ БАРБАРА (16+) Хикәйә. Унынсы бүлек.

Наҡыямы һуң инде туҡталып ҡала, ғәфү итә торған ҡатын? Тормошҡа уның үҙ ҡарашы бар. Әсәһе лә ҡыҙын әрһеҙләшергә байтаҡ өйрәтте, онотолмаҫлыҡ һабаҡтар бирҙе. Ана, Айзат завод директорының ҡыҙына өйләнергә йөрөй, тигән хәбәр ишетелеп ҡалыу менән, ике-өс көн эсендә кейәүен дә тапты. Ни хәл итәһең, ҡартыраҡ ине, әлбиттә. Бәлки һантыйыраҡ булмаһа, әле лә йәшәгән булырҙар ине. “Нисек ҡотолорға? Ҡайһы юлды һайларға?” Наҡыяның алдында һеңлеһенә ярҙам итергәме, юҡмы тигән һорау тормай. Һеңлеһенә хәҙер ярҙам кәрәкмәй. Уның ҡарынындағы баланы юҡ итергә кәрәк. Ҡатын икеләнеп торманы, Ҡырымда ял итеүсе әхирәтенә шылтырата һалды. Уныһы ла бүлмәһендә генә ятамы инде, ҡомда ҡыҙыналыр, телефонын алманы. Эльвира ярҙам итәсәк. Был уның ҡулынан килә. Күп тә үтмәне, Эльвира Наҡыяға шылтыратты. – Әхирәткәйем! Һин генә ярҙам итә алаһың! Һаҡланған һымаҡ та булғайныҡ, – тип алдаштырҙы ул, – ҡалғанмын да ҡуйғанмын. Бәлки алыр, тип көткәйнем, ғаиләһе, ҡатыны бар икән. Еңел генә ҡотолоу юлын өйрәт әле. Ҡырымдағы әхирәте бер нисә дарыуҙың исемен әйтте. Тик бик һаҡ булырға ҡушты. Һаулыҡҡа зыян килеүе ихтимал. “Әлбиттә, әлбиттә!”, – тип ризалашты Наҡыя. Бер нисә сәғәттән тейешле дарыу уның сумкаһында ята ине. Хәҙер Наҡыя, ике лә уйлап тормай, үҙе уйлағанса, хаслыҡлы эшен тормошҡа ашыра башланы. Хәҙер ул һеңлеһен бер аҙымға ла ситкә ебәрмәй, ҡарап ҡына йөрөтә, ашты ла ул һалып бирә, сәйен дә үҙе ҡоя. Ҡыҫҡаһы, Нәғимә бындай иғтибар-хөрмәткә ирене лә ҡуйҙы. Кисен Айзат килгәйне, апай сығырға ла рөхсәт итмәне. Иртәгәһен был иғтибар төшкө ашҡа тиклем дауам итте. Дарыуҙың һуңғы дозаһы сәй менән бергә ҡулланылғас, Наҡыя еңел һулап ҡуйҙы: хәҙер һөҙөмтәһен генә көтөргә ҡалды.