ҠАРТТЫ БҮЛЕШКӘНДӘ Хикәйә Беренсе бүлек

Уларҙың танышыуы осраҡлы ғына булды. Райхана ҡарсыҡ баҡсаһынан ҡайтып килә ине. Ике күнәк картуф, биш килолай кишер, ҙур ғына ҡабағын тәгәрмәсле арбаһына тейәп, берәйһе тартып алмаһын, тигән ҡиәфәт менән йөгөн ҡосаҡлап ултыра. Кеше күп, этеш тә төртөш, таушалып бөткән кейемдәге бар ҡарт, килеп кереү менән, балаларҙы этеп-төртөп, эргәләренә ултырҙы. Теге баштан кондуктор килеп еткәнсе, байтаҡ ваҡыт үтте. Райхананың күҙҙәренә ҡарттың әле теге, әле был кеҫәһендә соҡоноуы салынып ҡалды. “Аҡсаһы юҡ, йә юғалтҡан”, – тип һығымта яһап өлгөрҙө ул. Ысынлап та, йыуан кондуктор, ҡарттың эргәһенә килеп етеү менән, аҡса таптыра башланы. Юҡ, тегеһе таба алмай. Шундай көнгә төшмәһә... Утыҙ һум да аҡсаһы юҡ икән. Ҡарт бирешмәй, һаман аҡсаһын эҙләгән була, ә кондуктор, тартыныу-нитеү юҡ, уҫал итеп аҡса ныҡыта. – Ошонда ғына илле тәңкә ята ине, – тип ышандырырға тырыша ҡарт, кеҫәләрен инде нисәнсе ҡат ҡайтарып. – Илле һум? Бына һеҙгә егерме һум сдача, иллелекте бирегеҙ. Юҡ, аҡса күренмәй. Шул ваҡыт Райхана түҙмәне, йөҙ һумын һондо ла: – Бабай өсөн түләйем, – тип өндәшеп өлгөрҙө. Юғиһә кондуктор, хәҙер төшөрөп ҡалдырам, тип янай башлағайны. Бабайға йән инде, ҡат-ҡат Райханаға ҡарап башын эйҙе, рәхмәттәрен уҡыны, хатта эргәһенә үк килеп торҙо. – Ҡайҙа төшәһең? – тине ҡарт ҡарсыҡҡа.