Рәлиф КИНЙӘБАЕВ АУЫЛСА ҺАНТЫЙ БАРБАРА (16+) Хикәйә. Унынсы бүлек.

нимә яҙҙы икән?
“Һинең Айзатҡа кейәүгә сығыуың дөрөҫ түгел. Һине бәхетһеҙ тормош көтә. Балаңды юғалтҡан һымаҡ, иреңде лә юғалтасаҡһың. Беҙ һине киҫәтеп ҡуйыуҙы бурысыбыҙ тип иҫәпләйбеҙ. Берүк, апайың һымаҡ, Айзатҡа ышанып йөрөмә! Әгәр уға кейәүгә сыҡһаң, бәхетһеҙ буласаҡһың!”
Нәғимәгә урамға сығып, беседкаға ултырыуҙан башҡа сара ҡалманы. Телефонын һүндереп ҡуйҙы.
Өшөй башланы һәм урынына кереп ятырға булды. Ҡараңғыла утты ла ҡабыҙып тормай, юрғанын асҡайны, түшәктән ҡап-ҡара бер хайуан күтәрелде һәм ҡыҙҙы быуа башланы. Нәғимә ҡысҡырып та өлгөрмәне, һушын юғалтып, ҡоланы ла ҡуйҙы.
Ғәҙәте буйынса, иртәнге биштә үк торған Әлиә ҡыҙының бүлмәһендә ишегенең ябылмауына иғтибар итте. Әллә иртән үк тороп йөрөймө икән? Ҡараһа, иҙәндә бер иҫке тун, ә уның аҫтында Нәғимә ята. Ҡото осҡан әсәһе тиҙ генә ирен саҡырҙы. Ул арала булмай, шау-шыуға уянып, өҫкө ҡаттан Наҡыя ла төштө. Нәғимәне урынына һалдылар. Һыу эсереп, арлы-бирле иткәс, ул һушына килде. Үҙе бер нәмә лә хәтерләмәй. Кемдеңдер ҡосаҡлап алғанын ғына иҫләгән һымаҡ. Йүгерешеп килеп, тәҙрәне ҡаранылар. Уныһы асыҡ. Ә аҫта баҫҡыс тора. Тимәк, баҫҡыс аша кергәндәр.
Батырҙың полицияла таныштары, хатта дуҫтары күп. Ул тиҙ генә береһенә шылтыратты, хәлде аңлатып бирҙе, үҙенең был хаҡта халыҡҡа белдерергә теләмәүен әйтте. Бер аҙҙан багажнигына эт ултырҡан полицейский ҙа килеп етте. Этте күреү менән, Наҡыяның юҡҡа сығыуын берәү ҙә иғтибарға алманы. Ҡалаға барып киләм, тигән һылтау менән, “Пежо”һына ултырып, күҙ менән ҡаш араһында юҡ булды. Этте тәүҙә баҫҡыс эргәһенә килтерҙеләр, аҙаҡтан Нәғимәнең бүлмәһендә тунды еҫкәттеләр. Эт ни, үҙенә ҡушылған эште белә инде, хужаһын йонсотоп, өй буйлап тегеләй ҙә барҙы, былай ҙа барҙы, ихатаны әллә күпме урап сыҡты, барыһын ғәжәпләндереп икенсе ҡатҡа, Наҡыяның бүлмәһенә керҙе. Аш бүлмәһен, мунсаны ла ҡалдырманы һәм ҙур гараждың ишек алдына барып ултырҙы ла, минән бурыс төштө, мин таптым, эҙләгән кешегеҙ ошонда булған, тигән ҡиәфәт менән, урынында ҡалды. Полицейский нимә әйтһен, бында машина булған, хәҙер ул юҡ. Ул әле генә сығып киткән. Ғөмүмән, машина хужаһы – йорт хужаһыының ике ҡыҙының береһе. Уларҙың мөнәсәбәте һәйбәт. Ҡыҫҡаһы, эт хаталана һәм башҡаларҙы ла үҙенең хатаһын танырға саҡыра.
Полицейский Батырҙың эргәһенә килде, ун метрлы ауыр ғына баҫҡысты ҡарап торҙолар, икеһе лә баш ҡағып аптыраштылар. Кинолог иң аҙаҡтан былай тине:
– Этем хаталанмай, – тине ул. – Ошо ҙурлығы баҫҡысты һөйрәп килгән кеше һеҙҙең арала. Ләкин ул һеҙ түгел. Ғәйеплене бөгөн өйҙә булғандар араһынан эҙләгеҙ.
Иртәнге сәйҙе эскәндә Батыр менән Әлиә төнгө ваҡиға хаҡында фекер алыштылар. Шул ваҡыт эргәләренә Нәғимә килеп инде. Ул илауҙан шешенгән, хатта ағарынып киткән һымаҡ.
– Ҡыҙым, әйт әле, бәлки шикләнерлек кешең барҙыр? – тине атаһы. – Эт ситкә китмәне, ошонда үҙебеҙең арала йөрөнә. Бәлки берәйһе аҫтыртын ғына һиңә зыян килтерәлер?
Гаражға Наҡыяның “Пежо”һы килеп инде һәм, оҙаҡламай, һатып алған әйберҙәрен күтәреп, үҙе лә күренде. Атаһы, әсәһе, һеңлеһе өсәүләшеп уға ҡаранылар. Ҡатын тәүҙә һиҫкәнде, хатта ҡулынан тоҡсайы төшөп китте.
– Нимә? Нимә булды? Ниңә миңә улай ҡарайһығыҙ? – тине ул ҡалтырана-ҡалтырана.
Тәүҙә өсөһө лә бер һүҙ ҙә өндәшмәне.
– Һине көтәбеҙ, – тине әсәһе. – Һин бит беҙҙең ҡыҙыбыҙ.
Ул арала булмай, атаһы ла иҫенә килде:
– Һинең ҡапыл юҡҡа сығыуың беҙҙе аптыратты. Полицейскийҙың Джегы, хатта һине эҙләп, гаражда “Пежо”ң ултырған мөйөштә лә еҫкәнеп ҡараны. Ә һин өйҙә юҡ икәнһең. Ярай, өйҙә булманың, бәхетең. Юғиһә, Джектың нисек өргәнен ишетер инең.
Батырҙың кинәйәләп, ҡабаланмай, һәр һүҙенә баҫым яһап, һығып сығарған һымаҡ ҡыланыуы һөйләүҙән бигерәк ғәйепләүгә оҡшағайны. Шуға Батыр ҡурҡып торманы, үҙ ҡыҙым тип йәлләмәне. Ҡыҙына тишерҙәй итеп ҡарап:
– Йә, ҡыҙым, Нәғимәнең балаһын юғалтыуын, уны төн уртаһында кемдеңдер ҡурҡытып йөрөүен, ә Джектың һинең менән осрашырға теләүен нисек аңлатырһың? – тине.
Наҡыяның хәле бөттө,ул ап-аҡ булды.

Дауамы бар.