Рәлиф КИНЙӘБАЕВ ҮҘЕҢДЕ ЭҘЛӘ ҺӘМ ТАП Хикәйә Өсөнсө бүлек

кей”, – тигәйне, Йәмиләһе инәлтеп, һөйләнеп торманы, инде лә юғалды. Күтәренеп килеп сыҡҡанын күргәс, Юнир бик ҙур хата ебәреүенә төшөндө. Кәзәне кәбеҫтә баҡсаһына ебәргән ише булды был, тип эстән генә һуҡранды ул. Әле бит үҙенә плащ, көҙгө пальто алырға кәрәк. Аҡсаһы етерме икән? Ҡыҙы иң осһоҙҙарын ҡараным, тиһә лә, байтаҡ йыйылып китте. Ни эшләһен, үҙе индереп ебәргәс, өндәшмәй генә түләне инде.
Такси менән генә барып, Юнирҙың әйберҙәрен ҡалдырҙылар ҙа, Йәмиләнең апаһы янына киттеләр. Уныһы бешеренгән-төшөрөнгән. Ни эшләһен, кейәүен эшкә урынлаштырыуға мөнәсәбәте булды бит. Ниндәйҙер ҡоҙағый аша сайттан уҡығанмы, күргәнме, ваҡытында әйтеп ебәреүе ана, хәҙер үҙен әйтеп ебәргән түгел, егеттең яҙмышын хәл иткән, хатта һуңғы хәл иткес ҡултамғаны ҡуйған хужабикә ҡиәфәтендә тота. Хужа итеп кенә тойһа, ярай әле, Юнирҙың нимә менән шөғөлләнәсәген белмәһә лә, кәңәштәр бирә, күрһәтмәләр еткерә. Йәнәһе, бында кем арҡаһында, нисек барып эләккәнеңде онотма. Беҙ инде байтаҡты эшкә урынлаштырҙыҡ. Китәләр ҙә, оноталар. Ундайҙар менән мөнәсәбәт тотмай, бәйләнештәрен өҙә икән.
Арлы-бирле итеүгә, тағы телефоны шылтыраны. Ҡайҙандыр еҙнәһе ишетеп ҡалған да, үҙенең донъяла барлығын иҫкә төшөрөргә теләүе, дөрөҫөрәге, Юнирҙың уның кухнялағы диванын файҙаланғаны өсөн бурыслы икәнлегенә ишаралауы.
Еҙнәһе менән һөйләшкән арала, Йәмиләһе, шкаф артына баҫып, бер-бер артлы кейемдәрен кейеп ҡарай. Былай ҡатын-ҡыҙ кейеменә килгәндә, Юнирҙың зауығы әллә ни тәжрибә уртаҡлашырлыҡ түгел, ләкин шунда уҡ күҙ алдына заманса кейенгән Разифа Сәлим ҡыҙы Юлдашева килде лә баҫты. Юҡ инде, Йәмилә кейенә белмәй икән. Бағанаға ҡапсыҡ элеп ебәрһәң дә, ул хәтле килбәтһеҙ булмаҫ. Һуң, әллә күпме аҡса түкте бит әле. Ни эшләһендәр, апаһына ҡушылып, аһ та оһ килеп, маҡташырға тура килде. Уф, бынау ерҙәре бигерәк асыҡ бит әле?! Юнирҙың әсәһе күреп ҡалһа, нимә тип әйтер икән? Ҡуй инде, ҡуй! Тәүбә! Әстәғфирулла тәүбә, тип кенә әйтерлек. Элегерәк, ауылға алып ҡайтһам, әсәй менән таныштырһам, тип уйлай ине. Юҡ, был кейем менән булмай.
Ни хәл итһен, еҙнәһен дә, инеп, ҡотлап сыҡты. Алып килгән араҡыһын әйләндереп-әйләндереп ҡараны. “Ҡайҙан алдың быны, ни хаҡ тора?” – тип һорашты. “Өндәшмә, эсһәң, эс, эсмәһәң,алып ҡуям”, – тине. Ә былай ҡустыһының эшкә урынлашыуына ҡыуаныуын йәшермәне.
Дүшәмбе, эшкә барғас, иң тәүҙә Ғәлинуров саҡырып алды. Еңелсә генә, ялды нисек үткәреүҙәре хаҡында фекер алыштылар. Күберәк Зиннур Мәхмүт улы һорашты. Юнир бер урынын да төшөрөп ҡалдырмай, ҡайҙарҙа булыуы, нимәләр эшләүе хаҡында һөйләп бирҙе.
– Ҡыҙың менән сауҙа үҙәгендә күргәндәр, – тине ул ҡоро ғына, – һәр хәлдә, тейешле ҡағыҙҙарға ҡул ҡуйҙың, иң яҡын кешеләреңә лә ҡайҙа, нимә эшләүең хаҡында, хатта эш хаҡыңа бәйле һорауҙарға ла теүәл яуап биреү мотлаҡ түгел. Юғиһә, ҡайһы берәүҙәр эшкә урынлашып өлгөрмәй, ә был хаҡта бөтә донъя белә.
– Был йәһәттән борсолмағыҙ, Зиннур Мәхмүт улы, –тине Юнир, – мин көн һайын, Сәлим Ғилметдиновичтың “үҙеңде эҙлә һәм тап” тигән һүҙҙәрен иҫкә төшөрәм. Эҙләйем, ләкин таба алғаным юҡ әле.
– Дөрөҫ эшләйһең, – тип йылмайҙы етәксеһе, – бына, мин хәҙер ун йыл эҙләйем, таба алғаным юҡ. Бәлки һин табып күрһәтерһең? Шәхсән кәңәшем бар һиңә, Юнир. Өйләнеү мәсьәләһенә бик һаҡ бул. Мин һиңә өйләнмә, шуға өйлән, быға өйлән, тип әйтмәйәсәкмен. Бындай эште һәр кем үҙе хәл итә. Йөрәккә ҡушып та, бойороп та булмай. Әле һин яңы эш башлап тораһың, эшеңдең төрлө ваҡыттары буласаҡ. Үткән йома Разифа Сәлимовна менән аҙнаға көн тәртибен төҙөгәнһегеҙ, әллә ни яңылыҡтар юҡ, күберәк – эш. Ә йома көн киске ундан төнгө өскә тиклем “шәхси ваҡыт”, тип яҙылған өлөшөнә иғтибар иттеңме?
Юнирға эҫеле-һыуыҡлы булып китте. Ул бит быға иғтибар итмәгәйне. Ундан төнгө өскә тиклем? Йома көн? Был ваҡытта нимәләр булыуы ихтимал?
– Бына, бит, ярай, һораным. – тип тел шартлатып ҡуйҙы Ғәлинуров. – Был эш тулыһынса һинең өҫтә. Хәҙер үҙе килгәс тә, ипле генә итеп аныҡла. Ҡайҙа барырға теләй?
– Ә ҡайҙа барыуы мөмкин? – тип һораны Юнир, аптыранып.
– Миллиондан артыҡ кеше йәшәгән ҡалала ял итеү, күңел асыу урындары бөткәнме ни? Бәлки төнгө клубтыр? Берәй урында концерт юҡмы? Ә һин төнгө ун икенән

һуң Салауат Юлаев һәйкәле эргәһендә нимәләр ҡыланғандарын беләһеңме?
– Белмәйем, – тине егет ғәйепле төҫ менән, – күргәнем юҡ.
– Ваҡытыңды йәлләмә, ҡартайғас, йоҡларһың. Бөгөн үк йөрөп сыҡ, ҡара, нәмәләр бар. Бәлки саунаға йыйыналыр. Белеп булмай. Ниңә йылмаяһың? Һиңә һаҡларға тура киләсәк. Ҡыҫҡаһы, хәҙер асыҡлайһың, һаҡлауҙы көсәйтергә тура килмәгәйе. Андрейҙы, йә Таһирҙы саҡыр. Кәрәк булһа, тағы өҫтәрбеҙ.

* редакция спиртлы эсемлектәр, тәмәке һәм башҡа наркотик матдәләр ҡулланыуға ҡаршы.