Рәлиф КИНЙӘБАЕВ ҮҘЕҢДЕ ЭҘЛӘ ҺӘМ ТАП Хикәйә Дүртенсе бүлек

Тура бәйләнеш аша: “Финанс бүлеге начальнигы Жанна Робертовна килде”, – тигәс, Разифа Сәлим ҡыҙы:
– Мин уны саҡырманым. Миңә предприятиеның финанс хәле тураһында бөтә һандарҙы яҙма килеш индерһен, – тип кенә күрһәтмә бирҙе.
Иң кәмендә, төп кешеләрҙең береһенең күҙенә салыныуға өмөт иткән Зәкиеваға, тыҡылдата баҫып сығып китеүҙән башҡа сара ҡалманы.
Юнир аҙналыҡ эш тәртибен тотоп керҙе һәм бик әһәмиәте булмаған бер нисә мәсьәләне асыҡлағандан һуң, Разифа Сәлим ҡыҙының күҙҙәренә ҡарап:
– Йома көн киске ундан төнгө өскә тиклем, беҙҙән ниндәй әҙерлек талап ителә? – тигән һорау ҡуйҙы.
– Тимәк, һеҙҙе йома көн төндә ҡайҙа сәфәр ҡылырға йыйыныуығыҙ ҡыҙыҡһындыра? – тине хәйләкәр генә йылмайып Разифа Сәлим ҡыҙы.
– Эйе, – тине Юнир, һис икеләнеп тормайынса, – нәмәләр була, кемдәр бара һәм минән нәмә талап ителә?
– Кейем-һалымығыҙ ул хәтле етди булмаһын инде, еңелсәрәк кейенегеҙ. Үҙегеҙ менән берәр егетте алһағыҙ, етә. Тағы, мине һаҡлайым, тип пистолет, автомат тағып йөрөмәгеҙ. Шулай ҙа, “Ҡала уттары” менән һөйләшеп, берәр урын алып ҡуйһағыҙ, яҡшы булыр ине. Мин бында йылдан артыҡ булманым, урындағы мөмкинлектәрҙе белмәйем. Шулай ҙа, тегенән ҡайтҡас, елләнеп алырға иҫәбем юҡ түгел.
– Яҡшы, бөгөн үк һөйләшербеҙ, – тине Юнир.
– Көтөп тороғоҙ, – тине Разифа, – һеҙҙең ғаилә хәле бындай мөмкинлектәрегеҙҙе, йәғни, төнгө клубҡа сәфәрегеҙҙе, күтәрә алырлыҡмы?
– Быныһы – беҙҙең эш, – тине Юнир, мөмкин тиклем киңерәк йылмайып, – быныһы өсөн борсолмағыҙ.
Юнир уйға ҡалды. Анкеталар, белешмәләр алдында ята, унда өйләнмәгән икәнлеге яҙылған. Әллә үҙенсә, өҫтәлмә мәғлүмәттәр генә талап итәме?
Бер арала Йәмиләгә шылтыратып, был аҙнаның бик мәшәҡәтле булыуы хаҡында киҫәтеп ҡуйҙы.
– Төндә ниндәй эш ул? – тип аптыранды ҡыҙ. – Һин тәүлек әйләнәһенә эшләргә уйламайһыңдыр?
– Был хаҡта мин берәүгә лә әйтергә тейеш түгелмен, – тине Юнир, – үҙем дә белмәйем, бәлки сит илдән ҡунаҡтар барҙыр.
– Белмәйем, белмәйем, – тине Йәмилә, – һин мине бер аҙ аптырата башланың.
Юнир төнгө клубҡа шылтыратып, байтаҡ мәшәҡәтләнде. Һуңынан ғына төшөндө, улар бит төндә эшләй, бәлки көндөҙ ял итәләрҙер? Байтаҡ көтөргә тура килде. Андрейға ошо хаҡтта әйткәйне, ул кәңәш бирҙе:
– Йыйыштырыусыһы булмаһа, берәй һаҡсы һымағыраҡ кешеһенә, сит илдән ҡунаҡтар бар, шуларҙың аяғы аҫтында ел үткәреп алырға кәрәк. VIP мөмкинлектәрегеҙ беҙҙе ҡыҙыҡһындыра, тип әйтеп ҡара, тине.
Юнир өндәшмәне, шулай ҙа кәңәште хәтеренә һалып ҡуйҙы. Бәлки, ысынлап та, һөйләшеүҙе ошо юҫыҡтараҡ ҡорорға булғандыр? Шуға Андрейҙың әйткәнен шыпа үҙгәртеп, сит илдән ҡыҙым ҡайтты, уға ҡаланың иң шәп урындарын күрһәтергә ине. Беҙҙе ВИП мөмкинлектәр ҡыҙыҡһындыра, тип әйтеүенә, трубканы һалып өлгөрмәне, клубтан шылтырата ла башланылар һәм иң юғары кимәлдә ҡабул итәсәктәрен һәм хеҙмәтләндерәсәктәрен белдерҙеләр.
Кисен Юнир үҙе ҡарап, танышып сығырға булды. Үҙең барып баһалауға етмәй инде ул. Кисен клубтың топ-менеджеры, үҙе сығып ҡаршы алды. Тәүҙә Юнир хаҡында белергә теләп, әллә күпме һорауҙар бирҙе. Егет күбеһен ишетмәмеш булды.
– Ниңә ул хәтле өтәләнергә, ваҡыты етер, белерһегеҙ. Ә әлегә күрһәтегеҙ, нимәләрегеҙ бар?
– Айырым ишектән, ошонан, керәсәкһегеҙ. Эстә тартыу тыйыла, шуның өсөн, бынауында тәмәке тартырға* мөмкин.
– Бынау кабина һеҙгә оҡшаймы? Әйҙәгеҙ, – тине менеджер.
Кереп ҡаранылар, ҡәнәфиҙәрен бик үк таҙа тип әйтеп булмай. Шунда уҡ ап-аҡ япмалар түшәргә булдылар.
– Ә бына, өҫтәге кабина нисек?
– Оһо! Быныһы, бына, аҙмы-күпме беҙҙең ҡунаҡтың ихтыяждарына яуап бирерлек. Етмәһә, бынан залдың мөйөшө генә түгел, яртыһынан күбе, ус төбөндә ятҡан һымаҡ, күренә.
Бик