Мине, мәҫәлән, уның ҡушаматы түгел, уңғанлығы аптырата торғайны. Колхоз ҡоролошо, үкенескә ҡаршы, кешенең эшләү һәләтен дәртләндермәй. Күберәк анкетаға ҡарай һәм тырышып эшләргә теләүселәрҙең мөмкинлектәрен сикләй ине. Ә Хәйбрахман бабай колхозда эшләргә лә өлгөрә, үҙенең донъяһын да ҡарай ине. Мин әле уның хаҡлы ялға сыҡҡас, өй төҙөп ултыртҡанын хәтерләйем. Баҡсалары икәү, быныһы инде бөтөнләй самаға һыймай, ә эсе тулы картуф та, ҡабаҡ та, сөгөлдөр ине.
Ошо уңғанлығына бәйле тел осонда уның хаҡында мәрәкәләр ҙә тора. Кем белә, бәлки оҡшамаҫ, бәлки килешмәҫ, яҙып тормайым. Беҙ бабайҙы уңған, егәрле, бер ваҡытта ла ваҡ-төйәккә бирешмәҫ зат итеп хәтерҙә ҡалдырайыҡ. Өйөндә өҫтөнә казак черкескаһы кейеп, алыҫ Ҡытайҙа төшкән фотоһы бар ине, уның ейәне Нурислам беҙгә уны йәшереп кенә күрһәтә торғайны. Ул фото хәҙер ҡайҙа икән?
Хәйбрахман бабай хәҙерге заманда йәшәһә, унан бай фермер, боронғосараҡ әйтһәк, унан етеш “кулак” ауылда булмаҫ ине. “Ҡытай” бабай һымаҡ донъя көтөргә өйрәнәйек!