Нәжәғәй ауылының үрге осонда йәшәгән Фирҙәт тә, өйөн төҙөп бөткәс, биҙәү эштәрен тик Рәфистән эшләтергә ниәтләгәйне. Янына Сәхиәһен саҡырҙы:
– Тел тигәндә телеп һалаһың, – тип башланы хәбәрен Фирҙәт, –Рәфискә арыу һүҙеңде йәлләмә, маҡта, һине өйрәтергә кәрәкмәй – ҡойоп ҡуйған дипломатһың.
Сәхиә иренең ышанысын аҡларға булды – шунда уҡ Рәфис оҫтаның йортона юлланды.
Оҫта ең һыҙғанып, тәҙрә ҡапҡастарына биҙәктәр ырып эшләй ине.
– Һаумы, ҡустым! Аллаһ ярҙамдар бирһен – ырамлы барһын эштәрең! – Сәхиә ихлас сәләмләште.
– Рәхмәт, апай, теләктәрең ҡабул булһын! Йортоғоҙҙо төҙөп тә бөттөгөҙмө? – Рәфис көлөмһөрәне.
– Белеп тораһың...
– Белеп торам, көтөп торам, йыш ҡына ҡурҡып торам. – Оҫта уйынсалап һамаҡланы. – Һеҙҙең дә өйөгөҙҙө һалып бөткәнегеҙҙе ишеткәйнем. Өлгөрөп булмай, апай, заказдар күп. Был арала ял төҫөн күргәнем юҡ. Мына сиратҡа яҙылғандарҙың исемлеге! – Ул, маңлай тирен ҡул һырты менән һыпыра-һыпыра, туҙып бөткән дәфтәр һондо.
“Йомошомдо тыңламаҫҡа алдан алып тора бит был...” – Сәхиә, көйөнөүен нисек тә һиҙҙермәҫкә тырышып, йылмайған булды.
– И-и, ҡустым, бирешә торғандарҙан түгелһең. Һиңә эш сыҙаймы: барыһына ла өлгөрөрһөң, заказдарыңды эшләп бөтөрһөң. Һай-һай, мынау биҙәктәрҙең матурлығы! Боронғо Ҡөрьән китаптарында ғына осрай бындайҙар...
– Ҡөрьәндән биҙәктәр күсергәнем юҡ. Күсерергә ярамай, гонаһы ҙур булыр. Барыһын да үҙем эшләйем, апай.
– Шулай шул, Рәфис ҡустым, ысын ижадсы бит һин! Хаҡтәғәлә һирәктәргә генә бүләк итә бындай һәләтте, шуны беләһеңме?
– Әлләсе... Уны-быны уйлаған юҡ.
– Уйламайһыңдыр. Уйланырға ваҡытың да юҡтыр инде. Бындай биҙәктәрҙе бик һәләтле рәссамдар ғына төшөрә ала. Һәр биҙәгең күҙ яуын алып тора. Йәнә шуны ла әйтәйем: рәссам ғына ла түгел, композитор ҙа һин! Таҡтаны ла тик үҙеңсә бысаһың. Бысҡың, зыңлап-зыңғырлап, скрипка тауыштарын сығара: зың-зың-ң... зың-ң-зың-ң. Әлегәсә ишетмәгән моң бит был – тот та көй яҙ!
Ҡаҙаҡ ҡағыуҙарың да икенсе: бейегәндә итектәрҙең еҙ үксәләре бер-береһенә тейеп-тейеп алған һымаҡ. Әлегәсә шәйләмәгәнһең икән, хәҙер ҡаҙағыңды ҡаҡҡан һайын диҡҡәт менән тыңла: тыҡ-тыҡ.. дыңҡ-дыңҡ... былай итеп берәү ҙә ҡаҙаҡ ҡаға белмәй! – Күҙҙәрен йомоп, ифрат хисләнеп, бер туҡтауһыҙ татылдаған Сәхиәне “һы-ы” тигән ауаз иҫенә килтерҙе.
Ифрат ғәжәпләнгән Рәфис яйлап һушын йыйҙы.
– Эшемде оҡшаталар, хуплайҙар ҙа. Әммә, апай, былай ҙа күктәргә күтәргәндәрҙе күргәнем, был тиклем дә оло һүҙҙәрҙе ишеткәнем булманы. Рәссам, композитор... Бер кешегә күп түгелме?
– Күп түгеллеген эштәрең иҫбатлай. Юғары зауыҡ, зирәк зиһен. Тәрән хис-тойғо, күңел һиҙгерлеге – рәссам, композитор, шағирҙарға нәҡ ошо сифаттар хас. Шуларҙың бөтәһе лә һиндә бар.
– Алай, мин дә шиғыр яҙа аламмы?
– Һин дә яҙмағас, кем яҙа уны! Тотон ғына, ҡустым, дан шиғырҙар яҙасаҡһың!
– Һы-ы... Шаштыраһың бит, Сәхиә апай! – Рәфис һаман ғәжәпләнә, һаман иҫе китә.
– Һис шаштырмайым, ҡустым, дөрөҫөн генә, тейәрен генә әйтәм.
– Китапса һөйләйһең, апай. Хәҙер йомошоңдо әйт.
– Йорттоң биҙәү, һырлау эштәрен тиҙерәк бөтөрөргә ине. Хаҡына тормабыҙ. Сиратҡа яҙма инде, оҙаҡҡа һуҙылыр. Сиратһыҙ ғына...
– Ярай, апай, кәрниздәрҙең, тәҙрә ҡапҡастарының үлсәмен алырға ике-өс көндән барырмын, көтөгөҙ.
...Фирҙәт менән Сәхиә ике-өс көн түгел, айға яҡын көттө – оҫта килмәне. Ни уйларға ла белмәгәс, икәүләшеп Рәфискә киттеләр.
Бәй, Сәхиә ни күрә: таҡта-тоҡта, балта-бысҡы, башҡа ҡорамалдар элек килгәнендә нисек һалынғайны – шул килеш ята. Сәхиәнең хәтере шәп: “Мына тигән шпион булыр инең” – тип юҡтан ғына маҡтамай бит уны Фирҙәте.
Тимәк, Сәхиә ҡайтып киткәс, Рәфис оҫта быларҙы ҡулына ла алмаған...
– Рәфисте көтмәгеҙ, ул тиҙ генә ҡайтмаҫ әле! – Сәхиә менән Фирҙәт янында оҫтаның ҡатыны тора ине.
– Ҡайҙа китте? – Ифрат ҡаушауҙан Сәхиәнең тауышы ҡалтыранды.
– Һыу буйында шиғыр яҙыр өсөн илһам эҙләп йөрөй. Аҙаҡ, төштән һуң, киндергә һүрәт төшөрә. Шунан таңға тиклем соланда, мунсала баян уйнай. Баяндың еллеһен һатып алды. Килем килтергән эшенән кинәт кенә биҙҙе лә ҡуйҙы. Хәҙер аҡсаһыҙ интегәбеҙ! – Ҡатынҡай, Сәхиәгә ҡырын-мырын күҙ төшөрөп, тәрән көрһөндө.
– Шиғырҙы күп яҙҙымы? – Сәхиә, сикһеҙ ғәжәпләнеп, оҫтаның хәләл ефетенә ҡараны.
– Иртәнән төшкә ҡәҙәр ағын һыуҙы күҙәтеп, аҡ ҡағыҙға текәлеп ултырһа ла, башына бер юл да килмәй икән.
– Киндерҙәрен күрһәт, нимәләр төшөргән?
– Һәр өйҙөң ҡапҡаларына үҙе элек яһаған аҡҡош, күгәрсен, бал ҡорттары, айыу, ҡуян һүрәттәренең күсермәләре инде – уларҙың нимәһен ҡарайһың...
– Баянда яңы көйҙәрҙе, үҙе ижад иткәндәрҙе уйнайҙыр?
– Интегә торғас, “Әпипә” не дөрөҫ уйнай башланы! – Ҡатынҡай, ҡапыл ҡырт боролоп, өйөнә табан китте.
– Нимәләр сурытҡайның? – Аптыранған Фирҙәттең төҫө ҡасҡайны.
– Үҙең ҡуштың да ҡустыны ҡупайтырға. Тырышып-тырышып маҡтағайным. Былай булырын кем белгән...