+12 °С
Ясна
Бөтә яңылыҡтар
Шиғырҙар
19 Ғинуар 2021, 20:10

МАРАТ КӘРИМОВ ҠӘЛӘМЕН НЫҠ ТОТА

Былтыр геүләтеп үҙенең туҡһан йәшлек юбилейын үткәрә яҙғандан һуң, Марат Кәримов офоҡтан юғалды.

МАРАТ КӘРИМОВ ҠӘЛӘМЕН НЫҠ ТОТА
Былтыр геүләтеп үҙенең туҡһан йәшлек юбилейын үткәрә яҙғандан һуң, Марат Кәримов офоҡтан юғалды. Хәйер, шағирҙар юғалмай, улар онотолмай. Айырыуса, Марат Кәримов һымаҡтар. Сатира һәм юмор һымаҡ тешле-ырғаҡлы, тоҙло-боросло жанрҙы буйһондороп тотоусылар бик һирәк. Элек “Һәнәк”тең һәр һаны һайын Марат ағайҙың шиғырҙарын биреп барғас, ул беҙҙең ғүмерлек терәгебеҙгә һәм таянысыбыҙға әйләнгәйне. Үкенесле хәл, сафтарыбыҙ һирәгәйә, ярай әле, Марат Нәби улы ҡәләмен ҡулында ныҡ тота. Барып, хәлен белдек. Беҙҙе күреүгә ҡыуаныуы!.. Ағай һин дә мин йәшәп ята, улдарын үҫтереп, оло юлға сығарған. Берәүһе сәләмдәрен Американың үҙенән күндереп тора. Ҡалғандары – эргәһендә. Бер китап ҡалынлығы шиғырҙар яҙған. Хәҙер беҙҙең алда шул шиғырҙарҙы, тәмле әйбер күп булмай, әҙ-әҙләп кенә, уҡыусыларыбыҙға еткереү бурысы тора.
Заманында Мәскәүҙең үҙендә Рәми Ғарипов менән бер осор уҡыған. Хатта бер килке “Һәнәк”тең баш мөхәррире булған, хәҙер иң өлкән әҙиптәребеҙҙең береһе – Башҡортостандың халыҡ шағиры Марат Кәримов үҙенең шиғырҙары менән беҙҙе уйланырға, көлөргә, кәрәк булһа, йылмайырға мәжбүр итә.
Иҫән-һау булығыҙ, Марат ағай!
“Һәнәк”тәр
Марат КӘРИМОВ,
Башҡортостандың халыҡ шағиры
УЙМАҠ ШИҒЫРҘАР
УРЛАЙҘАР
Эй урлайҙар, урлайҙар
Ярамай, тип тормайҙар.
Ултыртһалар ҙа бәлә юҡ,
Унда оҙаҡ тотмайҙар.
ЭСӘЛӘР
Эй эсәләр, эсәләр,
Ирҙәр менән бисәләр.
Унда мулыраҡ ҡояларҙыр тип
Ҡәберҙәргә күсәләр.
БЕЙЕҮҘӘР
Эй бейейҙәр, бейейҙәр,
Асса! Асса! тиеүҙәр
Юҡ алҡыштар көтә-көтә
Сәхнәлә баш эйеүҙәр.
СИРЛӘЙҘӘР
Эй тирләйҙәр, сирләйҙәр,
Сәйҙәр эсеп тирләйҙәр.
Тирләмәһә, был үлгән тип
Йәсин сығып ерләйҙәр.
ЙЫРЛАЙҘАР
Эй йырлайҙар, йырлайҙар,
Тик әллә ни ҡырмайҙар.
Моңо булһа бер хәл әле,
Бесәй кеүек мырлайҙар.
КӨТМӘГӘНДӘ ГЕНӘ
Ҡарт йәшлегем бөтөнләйгә
Үтмәгәндә генә
Бер йәш ҡатынға өйләндем
Көтмәгәндә генә.
Был донъяға килеүҙәре
Етмәгәндә генә
Ҡатын игеҙ бала тапты
Көтмәгәндә генә.
Бер ир килде шатлығыбыҙ
Бөтмәгәндә генә.
Уның береһе минеке! – ти
Көтмәгәндә генә.
Бәхетебеҙ артыҡ ҙурға
Китмәгәндә генә
Судья ярҙам ҡулы һуҙҙы
Көтмәгәндә генә.
Ә ул эште һаман хәл
Итмәгәндә генә
Ошо шиғыр килеп тыуҙы
Көтмәгәндә генә.
Һәр кемдең дә өҫтәлендә
Була ине шул икмәк.
Хикмәт әле бында түгел
Бына ҡайҙа ул хикмәт!
Читайте нас: