Ҡатыҡ сәйе

Йогурт тиһәң – йогурт була –
Сит илдәрҙең мәмәйе.
Беҙҙеңсә, башҡортса әйтһәң –
Ул була ҡатыҡ сәйе.

Ҡатыҡҡа һал сейә һутын,
Бал ҡушып әҙ-мәҙ бута.
Шешәләргә ҡойоп ҡуйһаң,
Бала шатланып йота.

Шешәләрен биҙәп ҡуйһаң,
Ҡарауы ла йәмлерәк.
Сит илдеке алыҫ торһон,
Беҙҙең йогурт тәмлерәк.

Тәмле, сөнки барыһы ла
Тәбиғәттән йыйылған:
Сейә тау битендә үҫһә,
Һөтө – беҙҙең һыйырҙан.

Башҡа ҡушымта кәрәкмәй –
Ингредиент тигәндәре.
Бында еткән һыйыр һөтө,
Тәбиғәт еләктәре.

Һыйырыбыҙ саф һауала,
Йәп-йәшел үлән ашай.
Йылғанан таҙа һыу эсә,
Уға яланда оҡшай.

Оҡшағас, һөтөн дә бирә
Күп итеп балаларға.
Әйҙә, эшләһендәр йогурт,
Файҙа булыр уларға.

Балалар ләззәтте һуҙып
Ҡапыл эсеп бөтмәйҙәр.
Ә шулай ҙа йогурт булһа,
Башҡаларҙы көтмәйҙәр.

Көтмәҫтәр шул – тәмле булғас
Беҙҙең башҡорт йогурты.
Сит илдеке шатландырмай,
Беҙҙең ил бит – бал йорто.

Риф ДӘМИНЕВ.