Шиғырхана

***
Ләйсән тигән һылыуҡайҙың
Зифа икән буйҙары.
Ләйсән тигән матурҡайҙың
Кемдә икән уйҙары?
Беҙ белмәйбеҙ ҡыҙҙар серен,
Әйҙә, сер-йомаҡ булһын.
Тормошонда киләсәге
Бәхеттәр менән тулһын.

***
Мәүлиҙәкәй ҡояш кеүек
Йылмайып көлөп ҡарай.
Ебәк төҫлө сәскәйҙәрен
Елдәр яратып тарай.
Йондоҙ кеүек күҙҙәренән
Серле нурҙар һибелә.
Мәүлиҙәнең йөрәгендә
Кем бар икән, кем белә?

***
Мөғлифәкәй, ҡара күҙкәй,
Эх, бер күрергә ине!
Тотоп алып сырылдатып
Эх, бер үбергә ине!
Ай-һай шаян, етеҙ болан,
Бер ҙә тоттормаҫ инде.
Тотторһа ла, һис кенә лә
Үҙен оттормаҫ инде!

***
Мине ситтән күҙләп кенә
Бер ҡыҙый ауыҙ йыра.
Кем ул икән тигән булам –
Ул бит беҙҙең Эльвира!
Эльвирабыҙ ҡошсоҡ кеүек
Гел һайрап ҡына тора.
Эльвираның эс серҙәрен
Үҙенән генә һора.

Ишдәүләт САФИУЛЛИН.

Нимә етмәй икән миңә?

Нимә етмәй икән миңә –
Сал сәсле ҡартҡа?!
Сығып китке килә бит әй
Баш һуҡҡан яҡҡа.

Юлдары тип-тигеҙ булһын –
Ундай ерҙәр бар.
Һүҙ ирке булһын – телемә
Ауыҙ эсе тар.

Бындағы һымаҡ ул яҡта
Алдамаһындар.
Тинен һанап, осон осҡа
Ялғамаһындар.

Эсмәһендәр – кисмәһендәр
Хәмер диңгеҙен.
...Эй йөрөгө килә минең
Донъяны гиҙеп.

Хата

Ауыҙында һаман да юҡ
Аҡыл теше.
Аҡыл менән аңлап булмай
Уның эшен.

Аҡылһыҙҙар, күр, ҡыуана –
Улар аңлай,
Был түрәне күккә сөйөп,
Һөйөп данлай.

"Тешһеҙ ауыҙ" көнө-төнө
Аҡыл һата.
...Ни ҡылһа ла, аҡылһыҙҙың
Эше – хата.

Фәрүәз СӘЙФУЛЛИН.

Йәнә юлланам кибеткә

Супермаркет “Мәғенит”
Инһәм күҙҙәр алара.
Осло кәбәндәй өйөлә
Брадукты, ала-ала.

Сифаты шикле аҙыҡтан
Шартлай яҙам, эс күбә.
Юл алмаҫҡа был кибеткә
Мең-мең әйтелә тәүбә!

Әпәй тотоп ант иткәнем
Төшмәһен генә башҡа,
Йәнә юлланам кибеткә –
Реклама түгелдер бушҡа.

Флүрә ХӘЛИЛОВА.