+7 °С
Ясно
Шиғырҙар
31 Декабря 2022, 05:00
ТҮГЕЛҺЕҢМЕ ДЫУАМАЛ?
Яңы йыл килә, Яңы йыл!Елдән етеҙ аттарҙа.Хужа булып түрҙән уҙырТупһа аша атлар ҙа.
ТҮГЕЛҺЕҢМЕ ДЫУАМАЛ?
Ниҙәр өмөт итәйем икән,
Нимәләр була көтөп?
Бәһлеүән егетме һин, Йыл,
Әллә бер йолҡош-өтөк?
Ғөрөф-ғәҙәттәрең ниндәй,
Түгелһеңме дыуамал?
Тыныс холоҡло булмаһаң,
Борсоп йөрөмә, килмәй ҡал.
Һөрт ҡайғылы күҙ йәштәрен,
Дәүләттәрҙе килештер,
Халыҡтар яуыз булмайҙар,
Үҙ-ара ҡул бирештер.
Биштән быуҙыр һин билдәрҙе,
Ҡот ҡундыр илебеҙгә.
Бер телдән дә кәм-хур түгел,
Тиңлек бир илебеҙгә.
Ямғырҙар яуҙыр көткәндә,
Көҙ кил мул уңыш булып,
Ҡырҙарҙан йыйған байлыҡтан
Буралар ташһын тулып.
Бөтөнлөк бир парлыларға,
Ул-ҡыҙҙарға иман бир.
Туғандарҙы, дуҫ-иштәрҙе
Урап үтһен яман сир.
Бына шулар – өмөттәрем.
Һинән шуларҙы көтәйек.
Яңы йыл килә – үҙ итәйек
Һәм хәсрәтһеҙ ял итәйек.
Рәфғәт РЫСАЕВ.
