Хатта
Махсус командировка алып,
Күрше ауылдарға барып,
Ундағы сүплектәрҙе лә сыҡты аҡтарып.
Тапмаһа, тағы, тағы аҡтарҙы.
О! Ул ифрат ҙур эш атҡарҙы!
Уныһы дөрөҫ, — һәр кем белә, —
Тауыҡ насар күрә.
Ҡараштары
Әллә ни китмәй ары,
Уның ҡарауы,
Эҙләнә бит, бер туҡтауһыҙ эҙләнә!
Ә был сифат —
Ғалим өсөн иң кәрәк нәмә.
Эҙләй торғас бер нисә йыл,
Табылды ем!
Ә кем
Ул емде ҡараған тотоп?
Баҡһаң,
Ғилми дәрәжә алғас,
Тауыҡ уны үҙе ҡуйған йотоп.
Ем эҙләмәй хәҙер сүплектән.
Ул этап үтте, ти, күптән.
Билдәле инде, коллегалар
Айырмайҙар тамаҡ.
Алда — ем тулы ҙур дөйөм табаҡ.
* * *
Фәндең юғарыраҡ кетәгенә
Ҡунаҡлағандыр, тим,
Бәғзе бер тауыҡ күҙле заттар.
Юҡһа, нисек пәйҙә булыр ине
Хәсрәт кандидаттар?!