Өләсәйҙәр

Самауырҙарын ҡайнатып,
Ҡоймаҡ ҡойорҙар ине,
Ойоҡбаштар бәйләй-бәйләй
Йомаҡ өйөрҙәр ине.
Йығылып тубыҡ ҡанатһаҡ,
Өрөп имләрҙәр ине.
Кисен ҡуйынына һалып,
Бәйет һөйләрҙәр ине.
Заманалар үҙгәрҙеме,
Үҙгәрҙекме үҙебеҙ?
Майка менән шортик кейеп
Өл(ә)сәй булып йөрөйбөҙ.
Ҡоймағын ярай ҡоябыҙ,
Тәңкә үрер толом юҡ.
Ғәфү итегеҙ, ейәндәр,
Беҙҙең һәр саҡ ваҡыт юҡ.
Әкиәт һөйләп тормайбыҙ,
Мультик ҡуйып бирәбеҙ.
Ейәндәр менән интернет
Селтәрендә гиҙәбеҙ.
Ҡайҙа өләсәй ҡосағы,
Ҡайҙа Ҡамыр батырҙар?
Йомшаҡ уйынсыҡ ҡосаҡлап
Йоҡлап китә сабыйҙар.
....Үҫеп килә ейәнсәрҙәр –
Буласаҡ өләсәйҙәр.
Беҙҙе хәтергә алғанда
Нимә генә һөйләрҙәр?

Фәриғә Күсәкова.

Фото: drive2.ru