ШИҒЫРХАНА

***
Берәүҙәр гел балда, майҙа йөҙә,
Маҡтап йәшәй түрә-ҡараны,
“Ағай”ҙарҙың ҡул-аяғын үбә,
“Күләгәң, – ти, – нурлы! Ҡара әле!”

Ҡоро ҡашыҡ ауыҙ йырта, тиеп
Әйткәндәрҙер бәлки шуғалыр...
Ялағайҙар, хәйләкәрҙәр генә
Ни өсөндөр үрләй юғары.

Радик ХӘКИМЙӘН.

ЙӘШ АРТИСҠА ФАТИХА

Ныҡ тырышма! Эш күрһәтһәң —
Батыралар.
Эшләмәһәң, шытыу менән
Ҡатыралар.

Ауыҙ йырып шыңғырлаһаң —
Шул да етә,
Еңел-елпе йырҙар йырла —
Ныҡ шәп үтә!

Иң мөһиме – һәр ҙур эттең
Артын яла,
Йылғыр заттар данды шулай
Яулап ала.

Арзан фатир, ҙур исем дә
Тиҙ үк булыр.
Ә Таланттар, һин үҫкәндә,
Шиңеп һулыр.

Ижад, тиеп маташма ла!
Уны ташла!
Халҡым, Телем, Илем, тиеп
Һүҙең башла.

Халыҡ, Ил, Тел – һиңә бик шәп
Ҡалҡан булыр.
Кемдер һиңә ҡаршы сыҡһа –
Талҡан булыр!

Илдең һиңә, һинең Илгә
Юҡ кәрәгең.
Үҙең ҡылан, как будто һин –
Ил терәге!

Алдыңдағын тапап үтеп,
Өҫкә үрлә –
Бәлки, сығып ҡуйыр һинән
Бер шәп түрә!
Түрәлек ул мәңге түгел,
Өлгөрөп ҡал –
Урла, байы, Шәхестәрҙән
Үсеңде ал.

Ижадсының һәр бер эшен
Юҡҡа сығар.
Ул үрләһә, карьераңа
Таяҡ тығар.

Меҫкендәрҙе маҡтап, күккә
Сөйөп ебәр,
Таланттарға төрлө бысраҡ
Өйөп ебәр.

Өтөктәрҙе өҫтөн итһәң –
Талант үлә.
Быны яҡшы үҙләштерә
Һәр бер түрә.

Мин – сатирик. Кинәйәне
Дөрөҫ аңла.
Үҙ башың бар, үҙ выжданың –
Һиңә Алла!

Вәлит ИЛЕМБӘТОВ.