+12 °С
Ямғыр
Бөтә яңылыҡтар
Шулай ҙа була!
19 Ғинуар 2018, 17:57
Үтенес
– Туғаным, һиңә бик ҙур үтенесем бар ине. Уйланым-уйланым да һинән дә шәберәк кеше булмаҫтыр, тинем…
"Һәнәк", № 12, 2017.
– Кеше хәҙер китап уҡымай бит, – тигән булалар. Буш һүҙ ул! Ана, яңыраҡ ҡына кеҫәһенә университет дипломын һалған Айнур Нурмөхәмәтовтың тәүге повесы сығып та өлгөрмәне — ҡырылышып алып бөттөләр. Өлгөрмәгәндәре зыҡ ҡубып китапты эҙләй.
– Һинең повесың кәрәк ине, – тип авторҙың үҙенә килеп етәләр. Алыу ғынамы әле! Йәш әҙипте төрлө райондарға осрашыуға саҡыралар. Ә инде үҙен күргәс, күҙҙәре бәзләп китә. Тегенеһен-быныһын төпсөнөп, һорашып һүҙҙәре бөтмәй.
Бына бөгөн дә йәш әҙип алыҫ райондан осрашыуҙан ҡайтып, киҫелгән ағас кеүек карауатына ауғайны ғына, телефоны шылтыраны.
– Һаумыһығыҙ, Айнур һеҙ булаһығыҙмы? – Йәнә таныш булмаған апай шылтырата ине.
– Эйе.
– Улайһа, бик шәп. Бына, туғаным, телефоныңды саҡ таптым, әй. – Унан апай повесть хаҡында һайраны.
– Һине яман шәп әҫәр яҙған тип бөтәһе лә маҡтай. Кеше тәк зерәгә һөйләмәйҙер. Беҙҙең райондыҡылар насар яҙа белмәй ул. Ана бит хәҙер тағы бер яҙыусы өҫтәлде! Маладис, туғаным! Кәнишне, әле әҫәреңде үҙем уҡымағанмын. Ярай, берәй тыуған яҡҡа юл төшкәндә миңә лә шул китабыңды керетеп сығырһың, йәме! Автограф яҙып тороп бирерһең. Теге ваҡыт үҙеңде телевизорҙан да күрһәттеләр.
Унан апай бер килке тынып ҡалды ла йәнә һүҙ башланы:
– Туғаным, һиңә бик ҙур үтенесем бар ине. Уйланым-уйланым да һинән дә шәберәк кеше булмаҫтыр, тинем…
– Ниндәйерәк йомош? – тип һораһа ла Айнур, апайҙың тел төбөн төҫмөрләне инде, моғайын, осрашыуға саҡыралыр.
– Миңә ете минутлыҡ ҡына доклад кәрәк ине, балаларҙы тәрбиәләү темаһына. Иртәнге унға тиклем өлгөртһәгеҙ, бик шәп булыр ине.
Йәш әҙип уйға ҡалды. Нимә эшләргә? Тәк, ете минутлыҡ тинеме әле? Уны яҙыу өсөн дә барыбер ваҡыт кәрәк. Арытылған. Үлтереп йоҡо килә. Юҡ, нисек кенә ярҙам итергә теләһә лә, яҙа алмаҫ. Унан ят апайға уңайһыҙланып ҡына яуапланы:
– Уй, апай, бер нисек тә булдырып булмаҫ ул. Беренсенән, мин мәктәптә бер көн дә эшләгән кеше түгел, унан өлгөрә лә алмам. Тота килеп кенә доклад яҙып булмай ҙа инде. Ниндәйҙер сығанаҡтар кәрәк.
Айнурҙың был һүҙенә яҡташ апайҙың иҫе китте шикелле.
– Сығанаҡ тиһегеҙме ул?! Китсәле! Анау тиклем китап һынлы китап яҙған кешегә шул ете минутлыҡ доклад яҙыу нимә генә инде ул!
– Юҡ, апай! Бер нисек тә ярҙам итә алмам. Һеҙ мине ғәфү итегеҙ, йәме!
– Тырышырбыҙ инде, – телефондың теге осондағы апай ризаһыҙ ғына шулай тине. Гүйә, күптәнге танышы кәрәк кенә ваҡытта уға ярҙам итмәгән. – Ярай, һеҙ ярҙам итергә теләмәгәс, икенсе яҡташ яҙыусынан һорармын.
Шул саҡ Айнур ярҙам һораусынан:
– Ул доклад ниңә кәрәк булды һуң ҡапыл? – тип һорап ҡуйҙы.
– Үҙем өсөн булһа, аптырамаҫ та инем. “Йыл уҡытыусыһы” конкурсында районда еңеп сыҡҡайным, иртәгә Өфөлә республика буйынса була. Унда райондың йөҙөнә ҡыҙыллыҡ килтермәҫкә кәрәк. Үҙем бер нисек тә яҙа алмайым. Былтыр беренсе урынды алған кешегә лә докладты ниндәйҙер ғалим яҙып биргән, тигәйнеләр...
Читайте нас:
© 1925-2024 «Һәнәк» Республика сатира һәм юмор журналының сайты. Сайт Республиканского журнала сатиры и юмора «Хэнэк» («Вилы»). Ойоштороусылары: Башҡортостан Республикаһының Матбуғат һәм киң мәғлүмәт саралары буйынса агентлығы; Башҡортостан Республикаһының "Республика Башкортостан" нәшриәт йорто дәүләт унитар предприятиеһы. Учредители: Агентство по печати и средствам массовой информации Республики Башкортостан; Государственное унитарное предприятие Республики Башкортостан Издательский дом "Республика Башкортостан".
Зарегистрирован Федеральной службой по надзору в сфере связи, информационных технологий и массовых коммуникаций по Республике Башкортостан 20 февраля 2017 года. Свидетельство о регистрации ПИ № ТУ02-01584
Баш мөхәррир: Илгиз Вәкил улы ИШБУЛАТОВ
Телефон
(347)292-77-60
Электрон почта
Адресы
450079, Башҡортостан Республикаһы, Өфө ҡалаһы, Октябрҙең 50 йыллығы урамы, 13. Республика Башкортостан, г. Уфа, ул. 50-летия Октября, 13.
Редакция
(347)292-77-60
Ҡабул итеү бүлмәһе
(347)292-77-60