Йәшәйһеләр бар әле !

Әле, етмәһә, теге ЖКХ тигән нәмәһе лә хаҡтарҙы күтәреп тора. Шулай булғас, парлашып йөрөп буламы ни?..

Бер көндө һүҙ сыҡты, ҡарттарға вакцина яһатырға кәрәк икән.

– Ҡарсыҡ, һин бөгөн бар, мин икенсе көнгә ҡалырмын, – ти миңә ҡартым.

– Ярай, – мин әйтәм.

Йыйына ғына башлағайным, битлегебеҙ таралып төшкән, лә баһа. Бына һиңә мә! Икенсе йыл кейәбеҙ бит, таралыр инде. Нимә эшләргә?

– Балниста бирерҙәр әле, – ти ҡартым. Барҙым инде, уларға ышанып. Унда инеүем булды, ишек төбөндә үк туҡтаттылар:

– Әбей, битлегегеҙ ҡайҙа?

– Бәй, һеҙҙә бирмәйҙәрме ни уны? Бахилы тигән нәмәһен бирәһегеҙ бит

– Һеҙгә барыһын да бирә башлаһаң, бынан сығып та тормаҫһығыҙ. Яҡында ғына дарыухана бар, шунан һатып алығыҙ.

Киттем абына-һөрлөгә шунда. Ишеген асыуым булды, миңә:

– Әбей, битлегегеҙ ҡайҙа?

– Һуң, – мин әйтәм, – шул битлекте һатып алырға килдем бит инде!

– Битлек һатып алыр өсөн унһыҙ инергә ярамай!

– Битлегем булһа, һеҙгә килеп тә йөрөмәҫ инем.

Кире өйгә ҡайтып китеүҙән башҡа әмәл ҡалманы. Аптырап ултыра торғас: «Ҡара әле, беҙҙең үлемтеккә тигән марля ята бит”, –  тигән уй башыма килеп төштө. Һандыҡтан шуны сығарҙым да уны киҫәктәргә бүлеп, ян-яҡтарына бау тағып, битлек яһап ебәрҙем, эй күп килеп сыҡты инде.

– Ныу, баш та инде үҙеңдә, ҡарсыҡ!– тип маҡтаған була ҡартым. – Былай булғас, беҙ тағы ла икәүләшеп урамда йөрөй алабыҙ бит. Нисек элегерәк башыңа килмәгән был уй? Тик бына икенсе нәмә эсте бошора әле минең...

– Нимы тағы?

– Үлемтеккә тип алынған ине бит был марля.

– И-и-ий, ҡарт,ул беҙгә хәҙер кәрәк булыр, тиһеңме? Вакцина яһатып алһаҡ!.. Йәшәйһеләр бар әле!

Гүзәл СӨНӘҒӘТУЛЛИНА.