Мәҫәлдәр

– Мин дә уға яҡшы хеҙмәт итәм. Ялған документтарға ҡул ҡуйып, бик күп аҡсаны кеҫәһенә һалам. Кешеләргә эшләргә ҡушып, йоҙроғомдо төйнәйем. Тегеләй-былай һелтәнеп күрһәтмәләр бирәм. Үҙем өсөн ҡаҡҡылап, һуҡҡылап мендәрҙе йомшартам. Юҡ, уның бойороғона буйһоноп, Баш аҫтына алып барам да һалам, – тип Ҡул да ҡайғы-хәсрәтен һөйләп алған.
Уларҙың һөйләшкәнен Баш тыңлап ятҡан да:
– Сәйнәнеп ятмағыҙ, бер ваҡытта ла минән юғары була алмайһығыҙ, – тип, ғырылдап йоҡлап киткән.

Ҡуян – түрә

Коридорҙан китеп барған Арыҫланға Ҡуян осрап, уның артына тибеп киткән.
Хайуандар донъяһында бер ваҡытта ла булмаған был хәлде Арыҫлан Айыуға һөйләп биргәс:
– Ҡуянды беҙҙең түрә итеп тәғәйен­ләнеләр бит, – тигән Айыу.

Иҫәр булғанбыҙ

Бейеүсе Аҡҡош менән Үгеҙ осрашҡас, йәшлектәрен, уҙған йылдарҙы хәтерләп ултырҙы.
– Аҡҡош һеңлем, элек беҙҙең бейеү ансамблдәренең сит илгә барған­дарын, лауреат исеме алып ҡайтҡан­дарын гәзиттәрҙә данлап яҙҙылар. Ни эшләп хәҙер ансамблдәр сит илдәргә бармай? – тип һораны Үгеҙ.
– Үгеҙ ағай, беҙ хәҙер аҡылға ултырҙыҡ.
– Нисек?
– СССР осоронда сит илдәрҙә яһаған сығыштарыбыҙ өсөн түләнгән долларҙы дәүләт үҙенә алып торҙо. Ә беҙ, меҫкендәргә, маҡтау. Демократия башланғас та әле, ҡыр ҡаҙҙары, турғайҙар, сыйырсыҡтар ансамблдәре ныҡышып-ныҡышып сит илдәргә йөрөнө. Әммә ашау ҙа, транспорт та, ҡунаҡхана ла беҙҙең иҫәптән булды. Ә конкурс уҙғарған сит ил капиталисының табышына һалым һалынмай, уға бик ҙур файҙа килтерә. Йәғни беҙ, сит ил байын байытып, төп башыбыҙға ултырғанбыҙ.
– Тимәк, иҫәр булғанбыҙ.
– Шулай, – тип ризалашты Аҡҡош.

“Сүп-сар” ордены

Хайуандар, ҡош-ҡорттар комиссияһы тәбиғәтте, таҙалыҡты һаҡлай белмәгән­дәр конкурсында “Сүп-сар” ордены менән кемде бүләкләү тураһында бәхәсләшеп ултыра икән.
– Иптәштәр, беҙҙең арала иң бысрағы Сусҡа, орденды уға бирәйек, – тине Ҡарлуғас.
– Күп хайуандар батҡаҡҡа ятып, ҡан эскес бөжәктәрҙән һаҡлана – был тәбиғи. Беҙ йәшәгән оялар бик таҙа, Ә кешеләр сүп-сарҙы, тәмәке төпсөгөн, ҡағыҙҙы, буш шешәләрҙе балкондан, тәҙрәнән ташлай. “Сүп-сар” орденын кешеләргә бирәйек, – тине Сусҡа.

Табип бесәй

Бесәй табип итеп тәғәйенләнгәс, Ашҡаҙан уға консультацияға килде.
– Ни булды? – тип һораны Бесәй.
– Бына ошо ит консерваһынан бешерелгән ашты ашағайным, сирләнем дә киттем, – тигән Ашҡаҙан, өҫтәлгә алған аҙығын ҡуйып.
Бесәй итте еҫкәп ҡараған да:
– Был консервалар ашарлыҡ түгел, башҡаса алмағыҙ, – тигән.
Табиптың даны халыҡ араһында таралғас, уға колбаса тотоп килә башлағандар. Бесәй уларҙың бик күп сорттарын кешеләргә ашамаҫҡа кәңәш биргән.

Юнир САЛАУАТОВ.