Яңыраҡ танышымды аэропортҡа оҙаттым. Юлда ул никахтың өҫтөнлөктәре хаҡында һөйләне. Йәнәһе, өйләнеү менән тормошоң ҡырҡа үҙгәрәсәк. Һиңә ашарға бешерәләр, өҫ-башыңды йыуалар. Ҡыҫҡаһы, һинең хаҡта хәстәрлек күрәләр.
– Ә ирек? – ҡаршы төшәм.
– Иреклемен, ҡатыным бөтөнләй ҡамасауламай.
Был ваҡытта беҙ паркта ултыра инек. Яныбыҙға ҡырҡ йәштәр тирәһендәге ағай килеп ултырҙы. Күлдәге керле, күҙҙәре аҡайған, ипһеҙ ҡылана. Ҡыҫҡаһы, кәйефе юҡ. Биштәренән китап алды, асты, ә унда шымсыларҙыҡы кеүек уйым яһалған, уйымда бер ҡап сигарет ята. Ҡаптан дерелдәй-дерелдәй сигарет алғас, шунда уҡ зажигалка сығарып тоҡандырҙы, һурҙы, күрәһең, нирванаға инәлер. Ҡәнәғәтлектән күҙҙәре ҡыҫылды, ҡулдары ҡалтырауҙан туҡтаны, арҡаһын эскәмйә һөйәнгесенә терәне.
Был ниндәйҙер үҙенсәлекле сигареттыр, уларҙы магазиндан алмайҙыр, законды боҙоп, балконда үҫтерәләрҙер, тип уйланым. Көтмәгәндә беҙ үкереү (тауыш түгел) ишеттек:
– Оле-е-е-ег!
Парктың икенсе башында арҡырыға ла, буйға ла бер сама ҡатын күренде. Ҡыҙарған, тиргә батҡан, бер ҡулында – сумка, икенсеһендә – бала. Шунда беҙҙең күршебеҙ тулҡынланды, һикереп торҙо, сигаретын урнаға ырғытты, кеҫәһенән һағыҙ сығарып ауыҙына ҡапты ла, ашыға-ашыға сәйнәргә кереште. Шымсы китабын биштәренә тыҡҡас, ҡатынына табан алпан-толпан атланы...
Күрәһең, был миңә ишаралыр. Өйләнмәҫкә...
Б. МӨХӨТДИНОВ.