Программист булып эшләүсе дуҫым һыуыҡ алдырып сирләгән. Йома көн шылтырата. Тауышы саҡ-саҡ сыға: «Ни эшләргә? Химия ҡулланғым килмәй. Больничный алһам, кеҫәгә һуға». Үҙем бер нисә мәртәбә ҡулланған һыналған халыҡ рецебын тәҡдим иттем: «300 грамлы көрөшкәлә ҡайнар шәрбәт сәй яһайһың. Уға ике ҡалаҡ күк көртмәле, өс ҡалаҡ араҡы өҫтәйһең. Таҙа эске кейем кейеп, юрғанға төрөнөп ятаһың да теге ҡайнар сәйҙе ауыҙыңды бешерә-бешерә эскәс, йоҡлайһың. Ике-өс сәғәттән шыр тиргә батаһың. Бөтә сир тир менән сығып бөтә. Таҫтамал менән һөртөнгәс, яңы эске кейемдә йоҡларға ятаһың. Иртән тороуыңа сир ҡул менән һыпырып алғандай юҡҡа сыға».
Кис көнө сәғәт ун берҙәр тирәһендә дуҫымдың ҡатыны шылтырата:
– Кәрим, һин Салауатты ни эшләттең?
– ?
– Эштән ҡайтһам, юрған аҫтында мышҡылдап ята. Өҫтәлдә һинең рецепт яҙылған ҡағыҙ.
– ?
– «Көрөшкә. 300 грамм араҡы, ике ҡалаҡ ҡайнар шәрбәт сәй һәм өс ҡалаҡ көртмәле! Шунан тиҙ генә карауатҡа!» Башын да күтәрә алмай, иҫерек.
P.S. Иң ҡыҙығы шунда: Салауат дүшәмбе көн эшкә һау-сәләмәт, күтәренке кәйеф менән сыҡҡан. Рецепта ҡаралған өс ҡалаҡ көртмәлене иҙергә онотмағанғалыр, күрәһең...
К. БАРЫЕВ.