Вампир

Тоҙо бар, доғаһын да тапты. Өләсәһе өйрәткәнсә эшләне. Бер аҙҙан еңелерәк булып китте. Тороп ултырҙы. Ни булды әле уға? Өсөнсө көн шулай сырхап ҡайта.
Әһә! Ул колонкаға һыуға барһа, Ҡафыя килә лә етә. Күҙгә инә яҙып, йылмайған булып, хә­бә­рен һөйләй, янында оҙағыраҡ тоторға тырыша. Бөгөн ҡайтырға ҡуҙғалғас, елкәһе сәнсеп-сәнсеп алғайны шул. Ҡафыя бер ни эшләткәндер, күрәһең. Телевизор көнө-төнө тиерлек экстрасенс, сихырсылар тураһында тылҡый. «Йә, ни эшләп ҡарарға икән? Эм-м, Йәмлиха апай им-том итә, кәрт аса, ноҡот һа­ла, тиҙәр. Шуға барайымсы», – тип уйланды Вазифа.
Йәмлиха йәш ҡатынды әйҙүкләп ҡаршы алды. Янына ултыртты ла, ҡулын тотоп, йөҙөнә текәлде.
– Киленкәй, күҙгенгәнһең бит. Шуға төҫөң ҡасҡан, башың да ауырталыр әле. Күҙ тейеүе зәһәр яман була. Ул аҫау айғырҙы ҡолата, оло ағасты ла ҡорота. Халыҡ ырымы буйынса, борондан кеше күҙе тейҙермәҫ өсөн яңы тыуған сабыйҙарҙы әҙәмгә күрһәтә һалма­ғандар. Маңлайына ҡором йә буяу һөрткәндәр. Йәш малдың муйынсағына ҡыҙыл таҫма тағыр булғандар. Хәҙер ҡайһы бер күҙектерәү­селәрҙе «вампир» тип атайҙар.
– Ҡан эсеүселәрҙе «вампир» тип йөрөтәләр түгелме?
– Мин әйткәндәр энергетик вампирҙар. Улар донорының көсөн ала. Тегенеһе хәл­һеҙләнә, уны сырхау баҫа, болоҡһой, яң­ғыҙлыҡтан ҡурҡа башлай… Һин һуңғы осорҙа ниндәй сит кеше менән йыш ос­раштың?
– Анау Ҡафыя апай менән.
– Ә-ә! Уның вампир булыуы бик ихтимал… Ҡәйнәһе шәпле генә әбей ине. Бер йылда шиңде лә ҡуйҙы. Ҡыл үңәстән үлеп китте, тинеләр. Хәҙер инде ире ҡоро һөйәк. Күпкә бармаҫ.
– Балаларының энергияһын нисек алмаған һуң?
– Улары интернатта ятып уҡыны. Әлеге мәлдә ситтәләр.
– Ул вампирҙан нисек һаҡланырға?
– Кәңәшем шул – ҡурҡма. Һис кенә лә ҡурҡыуға бирелмә. Уларҙы күҙгә элмәҫкә кәрәк. Асыуланһаң – бөттөң. Контакт булған – энергия алынған булыр. Иң яҡшы ҡалҡан – йылмайыу. Вампирҙар – бахыр кешеләр. Уларҙы йәлләргә кәрәк, үҙҙәре ҡаты сиргә дусар булыусан… Вампир, сихырсыларҙан ҡотолоу, аураңды һаҡ­лауҙың иң һәйбәт юлы – доғалар уҡыу. Көн дә, «Әлхәм», «Ҡолһыу-ал­ла», «Аятыл-Көр­си», «Әл-Фәләҡ», «Ән­-Нәс» сүрәләрен ҡат-ҡат уҡып тор. Кәмендә өс мәртәбә… Килен, бына ошо һыуҙы өшкөр­ҙөм. «Бисмилла» тип яйлап ҡына эсеп ебәр. Доға­лар яҙып бирәм. Шуны өскөлләп күн ме­нән тышла. Бетеү итеп му­йыныңа тағы йөрө. Мунса ингәндә генә си­серһең. Ярар, һине бөтөнләйгә һа­уыҡ­ты­рыуҙы Хоҙай Тә­ғәләгә тапшырайыҡ. Иншалла. Мин әйткән­дәрҙе тот­һаң, сирең кәмер ҙә юҡҡа сығыр. Тик бынан ары сит-ят күҙҙәрҙән һаҡ бул. Амин.
Вазифа бағымсы өйө­нән күңеле күтә­релеп килеп сыҡты. Нисектер тәне яҙы­лып, башы еңеләйеп киткәндәй тойолдо.

Фәрит ӘБҮБӘКЕРОВ.

Фото: sotymarket.ru