Юғалған күл

Ғәжәп серле булыу өҫтөнә, ифрат матур ҙа, һәләк шау­ҡымлы ла ул тылсымлы Төп­һөҙкүл буйҙары. Һәр саҡ үҙенә тартып ҡына ята. Һөҙәк ярҙары һомғол зифа ҡамыштар менән ҡапланған булһа, ҡуш дилбегә буйламаҫ зөмбәйендә алтын-һары томбойоҡтар үҫә. Шом тулы ҡумырыҡтарын йәшәмеш суртандар төйәк иткән, йәнә­шәһендәге түңәрәк һаҙында һуналар оя ҡора, торналар бала сығара. Ә үтә күренмәле таҙа­лығы Төпһөҙкүлдең! Йылҡыл­дап ятҡан терегөмөшмө ни!..
Ошо мәл эшем эйәһе бригадир килеп сыҡты.
– Ниңә ярға еткерә һөр­мәйһең? – тине ул тракторсыға яман ҡарап.
Ә малай ҡоронан яңы сығып килгән йәш, тәжрибәһеҙ тракторсы ҡапыл ғына нимә тип яуап бирергә дә белмәне.
– Үтә яҡындан һөрҙөниһәң, күлгә тупраҡ ағып төшөр ҙә, тө­бөнә ләм тулыр бит, – тигән булды. Ҡарағыҙ, ниндәй гү­зәллек!
– Тупрағы төшәме-юҡмы, уныһы, ҡустым, һинең эш түгел. Һинең эш ер һөрөү һәм мин нимә әйтәм, шуны урын еренә еткереп үтәү.
– Шулай ҙа күл йәлке бит әле, ағай. Күҙ йәшеләй мөл­дөрәп ята…
– Бына күрәһеңме, ун аҙым­дан артыҡ һөрмәй ҡал­дыр­ғанһың, – бригадир тракторсыны тупаҫ бүлдерҙе, – иртәгә килеүемә әйткәнде үтәмәһәң… Акт төҙөйөм дә, докладной… Гүзәллек, имеш…
Ошо ҡарап тороуға ғәҙәти генә һөйләшеүгә бихисап йылдар үтеп китте, күп һыуҙар аҡты. Бригадир ағаһын аңлай алма­ған егет, күл ярын аҡтарып торманы, ә ҡорос арғымағын ташланы ла ҡуйҙы. Ярҙы икенсе тракторсы һөрөп бөтөрҙө. Бөткәнме ни күндәм кешеләр…
Уның ҡарауы, Төпһөҙкүл инде бөгөн юҡ. Уның урынында – батҡағы әйләнеп ятҡан соҡор ғына. Хәҙер зифа ҡамышы ла, алтын томбойоғо ла күренмәй. һуналар оя ҡормай, торналары бала сығармай. Ҡасандыр дәү суртандар йөҙөп йөрөгән, иртән­ге ысыҡ ише саф һыу урынына әле ләм тулған да, күлдең төбө өҫкә үк ҡалҡып сыҡҡан. Өҫтәүенә, ул тирә-яҡҡа тын алғыһыҙ һаҫыҡ еҫ таратып ята…
…Ҡулына сыбыҡ тотҡан ап-аҡ сәсле ҡарт килә. Йөҙө үҙенең таныш һымаҡ. Сырамыттым да баһаң тегене: элекке бригадир иптәш бит! Хәҙер уның «пенсия» ашап ятҡан көнө. Әле аҙашҡан быҙауын эҙләп йөрөй икән.
– Аһ, ниндәй ятҡан Төп­һөҙкүлде бөтөрҙөләр бит, ә, – тип уфтанды ул, ҡулын ҡаш өҫтөнә ҡуйған килеш, – ма­турлыҡ баһаһы менән гүзәллек ҡәҙерен белмәйҙәр шул беҙҙә…

Ринат НОҒАМАНОВ.