ХХII быуатҡа хат

ХХI быуатта беҙ бик һәй­бәт йәшәнек, тип әйтергә була. Бигерәк тә ҡәҙерле депутат­тарыбыҙ. Ә ябай халыҡ интекте. Уларҙың бәләкәй генә эш хаҡынан әллә күпме квартплата тү­ләт­теләр. Уныһы ай һайын артып тора. Урмандағы ҡорт­ло бәшмәк һымаҡ. Быныһы бер булһа, икенсе яҡтан, йыл аҙа­ғында һалым түләп эт булдыҡ. Машина­ңа, ереңә, бесәйеңә, этеңә…
Тиҙҙән тәбиғәт байлыҡ­тарын да тотоноп бөтөрбөҙ, ахыры. Ләкин һеҙ борсол­мағыҙ, ҙур-ҙур сүплектәр ҡалдырҙыҡ. Унда бөтәһе лә бар. Әгәр ҙә һеҙҙең ике ҡулығыҙ, ике аяғығыҙ һәм башығыҙ булһа, сүплек­тәрҙән барыһын да табып була. Кейем-һалымдан башлап йәнең теләгән әйбер бар. Ләкин таҙа һыуҙы таба алмаҫһығыҙ. Беҙ ҙә таҙа һыуһыҙ, таҙа һауаһыҙ көн күрҙек. Һыуҙы магазин­дарҙан һатып алдыҡ. Хәҙер унда ла бөткән, тиҙәр. Бер ниндәй аҡсаға ла таҙа һыу һәм таҙа һауа һатып алып булмағанын аңланыҡ. Һеҙ таҙа һыуҙы бер генә ерҙән, ул да бул­һа – Антарктиданан таба алырһығыҙ. Беҙҙең быуат унда барып етә алманы, сөнки һыуыҡтан ныҡ ҡурҡтыҡ.
Әгәр ҙә «Араҡы» йәки «Һыра» тип яҙылған шешә­ләр тапһағыҙ, уларҙы нефть скважиналары ярығына ырғытығыҙ. Үҙегеҙ улар тирәһенә яҡын да барма­ғыҙ, сөнки бөтә булған эсемлектәрҙе эсеп бөтөрҙөк. Тағы ла һеҙгә матур ғына дүрт мөйөшлө йәшниктәр осрар. Уларҙың бер стенаһы быяланан эшләнгән булыр. Беҙҙeң заманда компьютер­ҙар тип атала тор­ғайны. Шунда бер нисә төймәһенә төртөп алһаң, беҙҙең тормошто күрһәтә башлар. Бигерәк тә яланғас ҡатын-ҡыҙҙарыбыҙҙы күрһәтәләр. Әйтерһең дә, кейергә бер нәмәләре лә булмаған. Уларға ышан­мағыҙ, беҙҙең ҡатын-ҡыҙҙарыбыҙ мода тигән булып шулай йөрөй.
Үҙебеҙҙең планетала тәр­тип булдырырға уйлағай­ныҡ та, килеп сыҡманы. Хәҙер беҙҙә бер кем дә гәзит-фәлән, китап-маҙар уҡымай. Ошо компьютер тигән йәшниккә текәлеп, төймәләренә баҫҡылап тик ултыралар. Тиҙҙән яҙыу-һыҙыу эшен дә онотоп ҡуйы­уы­быҙ бар, шуға уйланыҡ-уйланыҡ та һеҙгә хат яҙып ҡалдырырға бул­дыҡ.
Бәхетле булығыҙ, ҡәҙерле киләсәк быуат!

ХХI БЫУАТТА ЙӘШӘҮСЕЛӘР.