Бына, туҡланыу яғын алайыҡ. Корея ашнаҡсыһын эшкә яллаған инем. Йылына миллион евроға. Башта бик шатланған инем. Ә хәҙер ниңә алдым тигән көнгә төштөм.
– Ҡыйбатыраҡ һорай икән шул. Шуның өҫтәүенә бешерә лә белмәй.
– Ни эшләп Корея ашнаҡсыһы бешерә белмәй тип уйлайһың?
– Үҙең әйтәһең бит. Ниңә алдым тигән көнгә төштөм тиһең.
– Эш шунда: ул бик тәмле бешерә, телеңде йоторлоҡ итеп.
– Бына ҡыҙыҡ. Яҡшы бешергәс, бүтән нимә кәрәк? Һиңә быға шатланырға ғына кәрәк.
– Шатланырға урын бармы ни?
– Ни эшләп булмаһын?
– Һуң, күп ашала, тим. Туҡтай алмайым. Ашайым да ашайым. Бер тапҡыр шул хәтле күп итеп ашағанмын, эсем күбенгән. Иҙән буйлап тәгәрләтеп йөрөттөләр.
– Һуң әҙерәк аша.
– Тыйылып буламы ни? Сығарып ебәрер инем, ул бешермәһә, ашай алмайым. Юҡ, байҙарға йәшәү еңел түгел! Бына кейем проблемаһын ғына алайыҡ. Аҙна һайын кейгән кейемдәрем бәләкәйләнә. Яңыһын тегергә кәрәк була. Бөтә ерҙе ике тапҡыр үлсәп мине интектереп бөттөләр инде. Көнөм ике сәғәт тегеүсе янында үтә бит.
– Быға ғына түҙәһең инде.
– Эш шуның менән бөтһә, һәйбәт тә ул. Яхтам моданан сыҡты бит, әй. Хәҙер яңы яхта тураһында уйларға кәрәк. Моданан ҡалышҡы килмәй.
– Ҡыйын шул һиңә. Нисек йәшәйһеңдер был ҡыйынлыҡтарға түҙеп?
– Былар ғына түгел шул ҡыйынлыҡтар. Сирлеләр әллә ҡайҙан минең телефонды белә. Сим-картаны ла алмаштырып ҡына торам. Барыбер беләләр. Әллә ниндәй операция яһатмаһам, ғүмерем өҙөлә, ә яһатырға аҡса юк, зинһар ҡотҡар мине, тип шылтыраталар. Мин бөтә хәйерсегә лә ярҙам итә алмайым бит инде. Аңламайҙар шуны.
Йөҙ мең евро түгел, йөҙ һум да бирмәйем. Хәйерсенең үлгәне артыҡ. Шулай һәйбәтерәк килеп сыға. Бигерәк тә үҙе өсөн һәйбәт. Бүтән интекмәй.
– Ниңә ҡайғыраһың һуң улай булғас?
– Ваҡытты алалар бит шылтыратып. Ҡайһы ваҡыт төндә лә шылтыраталар.
– Ҡыйын икән ул байҙарға. Интегеп йәшәйһең.
– Шулай. Еңел түгел. Түҙәм инде. Ҡыйынлыҡтарға түҙҙем, түҙәм һәм түҙәсәкмен.
Юныс ЗӨБӘЙЕРОВ.
Фото: dvhab.com