Әсәйем билет алды, бәләкәй булғанлыҡтан, ул миңә кәрәкмәй. Ҡойма янында үлән өҫтөндә күптән ҡырынмаған ике ир ултыра. Мин, шуҡ ҡыҙыҡай, уларҙың янынан үткәндә асылған, ләкин әле эселмәгән араҡы шешәһен йәһәт кенә эләктерҙем дә ҡапҡаға йүгерҙем. Ирҙәр минең арттан ташланды. Ләкин уларҙың юлына ҡарауылсы арҡыры төштө:
– Ҡайҙа?
– Туғанҡайым, – тип ҡысҡыра ирҙәр, – ул теге... ни... беҙҙең шешәне сәлдерҙе!
– Билеттарығыҙҙы күрһәтегеҙ, граждандар, билеттарығыҙҙы!
– Командир, аҡсабыҙ юҡ, әсәйем менән ант итәм, һуңғы тиндәргә баш төҙәтергә алғайныҡ!
– Аҡса юҡ икән, билеттар ҙа юҡ. Билеттар юҡ икән, баҡса ла юҡ! Индермәйем!
Әсәйем ҡатып ҡалған, ә мин баҡса буйлап йүгерәм, ҡулымда ҡояш аҫтында шешә йылтырай. Ҡоймаға тотоноп, ирҙәр ялына:
– Балаҡайым, матурҡайым, шешәне бир! Бир!
Ҡапҡа төбөндә ҡарауылсы йылмая. Ниһайәт, әсәйем иҫенә килеп, мине ҡыуырға тотондо. Тотҡас, әрләй-әрләй йомшаҡ еремә һуҡҡас, ҡарауылсының ҡәнәғәтһеҙ ҡарашы аҫтында теге бәхетһеҙ шешә хужаларына ҡайтарылды. Ирҙәрҙең береһе боролдо ла бар көсөнә икенсеһенең яңағына ҡундырҙы.
– Һин нимә? – тегенең күҙҙәре аҡайҙы.
– Әйттем мин һиңә магазин артында ултырайыҡ тип. Ә һин: “Тәбиғәт, саф һауа”. Ҡәбәхәт!
Ә. ЙӘНҒӘЛИНА.