– Юҡҡа аҡса туҙҙырма. Өйҙә бар бит.
– Ысынмы? Ниндәй файлда?
– Бында файл кәрәкмәй. Китап шкафында тора.
– Ҡағыҙ китапты әйтәһеңме ни?
– Булһа ни. Мин уны һинең кеүек саҡта уҡыным.
– Һинең кеүек саҡта... Һинең кеүек саҡта... Унда эҙләү юҡ. Һинеңсә, мин өҙөктәрҙе нисек табырға тейеш? Аудио-оҙатыу ҙа юҡ. Анимация һүрәттәр ҙә юҡ. Текст ҡына, унда хатта шрифтты ла алмаштырып булмай. Һин нимә? Мәктәптә минән көләсәктәр! Ундай китапты үҙең уҡы.
– Йә, ярай. Ана, DVD ал. Ун биш йыл элек һатып алғайным.
– Нимә? DVD? Һинеңсә, мин ул антиквариатты ни менән уҡырға тейеш? Уны политехник музейға тапшыр. Һин миңә тағы перфотаҫмалы Ғафури тәҡдим ит!
– Улай бик башлы икәнһең, үҙең селтәрҙән эҙләп тап та, бушҡа күсереп ал.
– Китапты бушҡамы?
– Эйе, ҡайҙалыр яталыр әле.
– Һеҙ быуат башында барыһын да бушҡа күсереп алғанһығыҙҙыр, бәлки. Биш йыл элек үк бөтә әҫәрҙәргә лә автор хоҡуғы Америка китап нәшер итеүселәр ассоциацияһына мәңгелеккә тапшырылыуын ишетмәнеңме ни? Әллә һин мине төрмәгә ултыртып ҡуйыуҙарын теләйһеңме?
– Ғафури американ түгел дә баһа! Бында американдарҙың ни ҡатнашы барҙыр, аңламайым. Бер файл өсөн 100 доллар артыҡ күп түгелме? Класташтарыңдан һорап тор. Ә һин уларға үҙеңдең берәй файлыңды бирерһең.
– Әһә! Әгәр улар миңә үҙ Ғафурийын бирһә, мин уны ҡайҙа уҡырмын?
– Нисек инде “ҡайҙа?” Улар үҙ күсермәләрен үҙ өйҙәрендә, ә һин үҙеңдекен бында.
– Ну, атай, һин донъянан бөтөнләй артта ҡалғанһың. Китапты уны һатып алған комптан ғына уҡырға мөмкин. Ҡыҫҡаһы, атай, аҡса бир!
– Йә, ярай. Бына һиңә беҙҙең счеттан 99 бакс алыр өсөн бер тапҡыр файҙаланыла торған пароль.
– Ок. Күсереп алдым.
– Миңә лә күрһәт әле. Улым, ҡара әле, бында ниндәй һүрәттәр ул? Әҫәрҙә бындайҙары юҡ ине шикелле.
– Баннер улар. Уларһыҙ китап 699 бакс тора.
– Улым, повестың тексы ниңә күренмәй ул? Баннерҙарҙың юғалғанын көтөргә кәрәкме ни?
– Әллә Айҙан төштөңмө? Тексты махсус күҙлек кейеп уҡырға кәрәк, әтеү реклама ғына күренә.
– Ә күҙлек нимәгә?
– Китапты аҡса түләгән кеше генә уҡый алһын өсөн.
– Әгәр мин һинең күҙлекте кейһәм?
– Барыбер уҡый алмаясаҡһың, сөнки ул минең күҙгә генә иҫәпләнгән. Лицензия бөткәнсе өлгөрөргә кәрәк, юҡһа, йә файл арендаһын оҙайтырға тура киләсәк, йә китап юҡҡа сығасаҡ. Ҡамасаулама, мин уҡыйым.
***
Бер сәғәттән һуң.
– Уффф, уҡып сыҡтым!
– “Ҡара йөҙҙәр”ҙе бер сәғәт тәме?
– Эйе, 15 минут һайын реклама булмаһа, тиҙерәк тә уҡый алыр инем.
– Барыбер ышанмайым! Әйт әле, Ғәли кем ул?
– Кем-кем?
– Ә-ә-ә, аңлашылды. Фәхри менән Хәмиҙә кем? Закир?
– Ҡайҙан беләйем! Мин Ғәлимәнең аҡылдан яҙғас мәкегә төшөп үлеүен генә уҡыным. Бүтәндәрҙе белер өсөн башҡа версияларҙы һатып алырға кәрәк. Беҙҙең ундай аҡсабыҙ юҡ бит.
– Аҡылдан яҙырһың, был донъя ҡайҙа тәгәрәй?
– Тәгәрәгән инде. Был хаҡта ун биш йыл элек уйларға кәрәк ине, унан да иртәрәк булмаһа әле...
Ә. ҠАРАҒУЖИН.