Бәрәңге утауҙың, бүлбеләрҙе йыйыуҙың рәт-сиратын беләбеҙ. Был юлы бәрәңге ҡаҙыу урынына беҙгә, – миңә, Айҙарға һәм Сиражиға, – һыналған өс дуҫҡа, “махсус эш” ҡуштылар. Һыйырҙарға вакцина яһарға ваҡыт еткән икән. Етмәһә, һуңлатырға ярамай, тиҙәр. Әлбиттә, һәүкәштәргә энәне ветеринар ҡаҙарға тейеш, беҙ ярҙамсылар ғына, йәғни уларҙы тотоп торабыҙ. “Ҡулдан килгән тиклем тынысландырырға”, – тип өгөт-нәсихәт бирҙе төркөм етәксеһе.
Эш былай ойошторолғайны: һәр һыйырҙы сиратлап аранға ҡыуып индерәләр. Айҙар уның мөгөҙҙәренән тота (ҡулынан килгән ҡәҙәр тынысландыра), мин иһә ветеринар укол һалғансы, арт һын өсөн яуаплы. Операцияның был өлөшө, ғәжәпкә ҡаршы, бик ыңғай барҙы. Бәлки, Айҙар һәүкәштәрҙе тынысландырыу өсөн тейешле һүҙҙәр тапҡандыр, бәлки, табип үҙ эшенең оҫтаһы булғандыр. Сиражиҙың бурысы – “пациенттарҙы” сиратлап “операция бүлмәһенә” ҡыуып индереү.
Һыйыр, билдәле булыуынса, тиҫкәре мал, аҡыл яғы самалы. Сиражи уларҙы сыбыҡ менән ҡыуҙы, айырыуса тиҫкәреләрен һүгеп тә алды.
Бына уға алға бер аҙым да атларға теләмәгән “пациент” тура килде. Сиражи уны тирәләп йүгереп йөрөй, ә һәүкәш ыжламай ҙа. Ҡыҫҡаһы, дуҫыбыҙҙы сығырынан сығарҙы. Тупаҫ көс ҡулланды, тиҫкәренең һыртына таяҡ менән һуҡты. Һуғыуын һуҡты ла ул, ләкин шунда уҡ үкенде. Һыйыр мөлдөрәп Сиражиға ҡараны. Ул да, беҙ ҙә һыйырҙар шул тиклем мәғәнәле ҡарар, тип бер ҡасан да уйламай инек. Уның ҡарашында бөткөһөҙ хәсрәт һәм аяуһыҙ донъяға үпкә сағыла ине. Ул арала булмай, һыйыр боролоп аяҡтарына ултырҙы ла, йәнһеҙ кәүҙәһе менән “үлтереүсенең” алдына ҡоланы.
Дәүләт милкен әрәм-шәрәм итеү күҙ алдында. Малдың башына еткән Сиражи ауыҙын асып, күҙҙәрен таҫрайтып ҡатып ҡалды. Айҙар уның һүҙһеҙ һорауына яуап бирҙе:
– Дуҫҡайым, 500 тәңкәңде әҙерлә!
Ул осор өсөн бик күп аҡса.
– Егеттәр, ни эшләргә инде миңә хәҙер?
– Быны һин үҙең беләһең… яһалма һулыш алдыр, – тип кәңәш итте Айҙар.
Сиражи үле кәүҙә янына тубыҡланды. Берәй ваҡыт малға яһалма һулыш алдырғанығыҙ бармы? Кешене бындай осраҡтарҙа, ғәҙәттә, арҡаһына ятҡыралар. Сиражиҙың быны эшләргә хәленән килмәне, шуға күрә һыйырҙың башын күтәрҙе лә яңаҡ һөйәктәрен ҡуҙғатырға тотондо.
Йоҡлаусы һылыу бындай принцты көтмәгәйне, күрәһең. Ул ваҡытта айыры тояҡлыларҙы яратыу модала түгел ине шул әле. Һыйыр ҡурҡышынан мышнап, тороп баҫты ла ситкә тайпылды.
Беҙ уға прививканы һуңынан барыбер яһаныҡ.
Ә. ШАКИРОВ.
Фото: agro-kazakhstan.com