Мөғжизә

– Ни булды? Әллә Әнисәң (ҡатыны) менән асыуланыш­тыңмы?
– Барыһы ла тәр­типтә. Тик бы­на улар­ҙың дачаһы ме­нән аңлашылмаусанлыҡ килеп сыҡ­ты.
– Ни булды һуң?
– Уның өләсәһе ярты баҡ­са­һында сәскә үҫтерә. Әни­сә яр­ҙам итеүемде үтенде – сәскәләр өсөн ниндәйҙер ашлама табырға ҡушты. Мин вәғәҙә бирҙем.
– Ярҙам иттеңме һуң?
– Иттем. Танышыма шыл­ты­рат­тым, уның атаһы фер­мер. Ашлама менән ярҙам итә ала­һыңмы, тип һора­ным. Ул, күпме кәрәк, тип белеш­те. Мин, ярты баҡсаға етер­лек, тинем, йәғни биш су­тыйлыҡ. Ул адресты һо­раны, бер шешә араҡы әҙер­ләргә ҡушты, иртәгә кил­терәм!
– Килтерҙеме һуң?
– Бөтә бәлә лә шунда шул: килтергән. Ҡапҡаны ҡаҡҡан – бер кем дә асмаған. Миңә шыл­тырата. Ҡойма артына, берәй мөйөшкә ташларға ҡуштым. Ике сә­ғәттән һуң Әнисә шылтырата. Асыуы алҡымына тығылған. Кем­дер ҡойма аша беҙгә әллә күпме тиреҫ түгеп киткән, ти. Еҫенә ун саҡрымдағы бөтә се­бендәр йыйылған. Түҙеп тор­ғо­һоҙ һаҫыҡ! Эт ояһы тиреҫ аҫтын­да ҡалған. Өләсәйҙең ҡан баҫы­мы кү­тәрелгән.
– Нимә эшләргә йыйына­һың инде?
– Әйтмәйәсәкмен. Берәй­һен яллап, түк­терергә тура килер, ахыры. Тағы ла: хәҙер кем кемгә ярты тейеш ин­де?!
Дуҫым ауыр һуланы ла машинаһының ишеген асты.

P.S. Бер нисә көндән һуң шул билдәле булды: алдын-артын уйлап эш итеүсе өләсәй ҡан баҫымы төшкәс, тачкалап ти­реҫ һатҡан. Ярты көндә 2 мең тәңкә эшләгән. Тиреҫтең яртыһы ҡалған әле. Дуҫым эштең нисек килеп сыҡҡанын барыбер һөйләмәгән. Өләсәй иһә тағы ла ниндәйҙер мөғ­жи­зә көтә икән.

Ғ. ИСЛАМЕТДИНОВ.