Эш байлыҡтамы ни?

Һылыуҡай өйҙән сығыу менән, һауалағы йондоҙҙар һүнеп, хатта шишмәләр ағыуынан туҡтаған, сөнки ҡарашы барыһынан да яҡтыраҡ, ә тауышы шишмә сылтырауынан да көслөрәк булған. Атаһы ҡыҙын бик ныҡ яратҡан, шуға ла уның бар теләген дә тормошҡа ашырырға тырышҡан. Кейәүгә сығыр ваҡыты еткәс, ҡыҙ атаһына былай тигән:
– Атай, мин иң бай кешегә кейәүгә сығасаҡмын, тик ул шул уҡ ваҡытта ярлы ла булырға тейеш.
Бына ул көн еткән. Быларҙың йорто эргәһенә әллә күпме кейәү булырға теләгән ир-егеттәр йыйылған. Иң тәүҙә затлы-затлы туҡымалар, алтын һауыт-һаба һәм бик күп әйбер тейәлгән дөйәләр менән бер нисә сауҙагәр ингән.
Быларҙы күреп ҡыҙыҡай:
– Һеҙ үҙегеҙҙе бай, тиһегеҙме? – тип һораған.
– Әлбиттә, байбыҙ, күрмәй­һеңме ни?
– Улай булғас, ни өсөн иң ярлы кеше?..
– Cөнки һинең йөрәгеңде яуламағанбыҙ.
– Юҡ, юҡ, мин был һүҙҙәрҙе ишетергә теләмәгәйнем, – ти ҙә ҡыҙ уларҙы кире бороп сығара.
Икенсе булып данлы ғәскәр эйәрткән хәрбиҙәр күренгән.
– Ул тиклем бай түгелбеҙ, әммә ошо тиклем һалдат ярҙамында бөтә ғаләмде яулап алһаҡ, беҙҙән дә бай кеше булмаясаҡ.
– Ә ғәскәрһеҙ һеҙ нимә эшләй алаһығыҙ?
– Унһыҙ – беҙ ҡулһыҙ.
– Улай булғас, мин эҙләгән кеше түгел һеҙ, – тигән ҡыҙ.
Шунан ҡапҡала ике егет күренгән, быларҙың ҡулында затлы биҙәүестәр менән туп-тулы тартмалар, ти.
– Һылыуҡай, ошо хазиналарға күҙ һал әле. Улар әлегә беҙҙеке, ә һиңә барыһын да бүләк итһәк, иң ярлы кешегә әйләнәбеҙ.
– Әле байһығыҙ, һуңынан ярлыға әйләнәсәкһегеҙ. Ә бер юлы икеһе лә була алмайһығыҙ, шулай бит? Тимәк, мин һеҙҙе лә көтмәгәйнем.
Иң һуңында оялсан ғына сибәр егет инә, өҫтөндә – алама ғына кейеме. Ул ергә тиклем эйелеп иҫәнләшкән.
– Ярлылығың әллә ҡайҙан күҙгә ташланып тора, – тип мыҫ­ҡыллы йылмайған ҡыҙҙың атаһы. – Ә байлығың ҡайҙа һуң?
– Ул да гел үҙем менән, – тип егет кеҫәһенән сүкеш, ағас сүмес һәм энә килтереп сығарған. – Мин – бик оҫта тегенсемен, һинең ҡыҙыңа әле өҫтөнә кейгән күлдәгенән дә матурыраҡты тегеп кейҙерәсәкмен. Тағы ла яҡшы тимерсемен – бер өйөр йылҡы малыңды дағалап бирә алам. Йәнә шәп ашнаҡсымын, хатта батшалар өҫтәлендә булмаған ризыҡтарҙы әҙерләйем. Дөйәләр ҙә, һалдаттар ҙа, хазина ла кәрәкмәй миңә. Сөнки бөтә донъяның байлығы минең ҡулдарымда.
– Бына, ниһайәт, кейәү булырҙай егетте таптым, – тип шатлығынан көлөп ебәрә һылыу ҡыҙ. – Атай, күрәһеңме, байлығы – уның алтын ҡулдарында.
Һүрәт: ru.dreamstime.com