Исемлек

Кистән буйтым төшөргән Ғөбәй айнып етмәгәйне, шуға күрә исемлек төҙөп ҡалдырҙы:
1. Тауыҡ бото йәки тауыҡ.
2. Икмәк.
3. Картуф.
4. Кишер.
5. Ҡаймаҡ.
6. Һөт.
Ҡатын эштән ҡайтҡанда ир йоҡлап ята ине.
– Мин ҡушҡандарҙың бары­һын да алдыңмы? – тип асыу­ланып һораны Мөнирә.
– Алдым... Исемлек буйын­са... – Ғөбәй мығырланы ла башын яңынан мендәргә терәне.
Ире алып ҡайтҡан аҙыҡ-тү­лек­те ҡарағас, ҡатындың ике күҙе дүрт булды. Пакеттан бер тауыҡ бото, ике икмәк, өс картуф, дүрт кишер, биш банка ҡаймаҡ, алты ҡап һөт килеп сыҡты...
Мөнирә ҡабат исемлек төҙө­мәҫкә ант итте.

Диван
Мөнирә диван һатып алды.
– Өйөгөҙгә алып барыу – 1700 һум, – тине һатыусы. – Нисәнсе ҡатта йәшәйһегеҙ?
– Унынсы.
– Һәр ҡат өсөн 100 һум.
– Беҙҙең өйҙә йөк лифты бар.
– Бер нәмә лә белмәйем, беҙҙә тарифтар шундай.
– Йөк лифты эшләһә ләме?
– Эйе!
– Ҡасан килтерәһегеҙ?
– Кискә табан. Алтынсы яртыла.
Ышанмай, йөк тейәүсе һәм бушатыусылар менән дә һөй­ләшеп ҡараны ҡатын. Улар ҙа һатыу­сының һүҙҙәрен раҫ­ланы. “Улай икән, аҡса һуға белә былар!” – тип әсенеп уйланы Мөнирә.
Диванды килтергәндә өйҙә йөк лифты эшләмәй ине. Ҡатын һөйөндө: “Аҡсам елгә османы шулай ҙа...”

Д. ҒИНДУЛЛИН.