Алдай белеп алдаһаң

Өфөлә йәшәүсе етмеш ике йәшлек ҡатындың фатирында телефон шылтырай.
– Һаумыһығыҙ?
– Хоҙайҙың биргәненә шөкөр, иҫән-һаубыҙ. Кем шылтырата, тауышыңды танымайым.
– Полициянан. Ни бит әле... улығыҙ юл-транспорт виҡиғаһы­на эләккән. Етмәһә, бер кешене имгәткән.
– Алдыңды-артыңды ҡарап йөрө тип, күпме әйттем! Тәки бәләгә тарыған икән...
–Ул ҡәҙәр борсолмағыҙ.
– Нисек борсолмайһың, ти. Үҙ балам да баһа!
– Эште ҙурға ебәрмәҫкә мөм­кин. Бының өсөн... ни... 250 мең һум аҡса кәрәк.
Бер аҙҙан “полициянан” килеп тә етәләр. Башы әйләнгән, туҡ­тауһыҙ йөрәге ҡаҡҡан, шунлыҡ­тан әленән-әле таблетка йотҡан ҡатын, тегеләрҙең документтарын да һорап тормай, ҡалты­рана-ҡалтырана аҡсаһын тоттороп ебәрә. Үҙенеке генә етмәгәс, ҡалғанын күршеләренән алып тора. Улының бер ниндәй ҙә юл-транспорт ваҡиғаһына ҡыҫы­лышы булмауы асыҡлан­ғанда һуң була инде.
Ярай, улының яҙмышы өсөн ҡурҡҡан оло кеше алданған да ти, ә бына ҡырҡ биш йәшлек ирҙең төп башына ултырыуын нисек аңларға?
Телефонға килгән смс-хәбәрҙе уҡығас, уның шатлығы эсенә һыймай. “Шевроле” автомобиле отҡан икән дә баһа! Бына, ис­маһам, бәхет! Һалымын түләһәң – автомобилгә һин хужа. Түбәһе күккә тейгән ир күрһәтелгән счетҡа кәрәкле сумманы  һала. “Отҡан” автомобиле менән ҡала урамдары буйлап елдерә алма­ғас, полицияға бара. Алдаҡсыны тота алмайҙар, әлбиттә. Счетта күрһәтелгән һандар бөтөнләй икенсе өлкәлә теркәлгән булып сыға.
Ошо юлдарҙы яҙып ултырғанда минең телефонға ла смс-хәбәр килде. Мин дә автомобиль отҡан­мын, имеш... Бушҡа бирһәләр ҙә алмаҫҡа булдым әле. Туҙа төшһә лә әлегә үҙемдеке йөрөр­гә эшкинә.

Д. ҠАРАНОВ.